ރާއްޖޭގެ ޒުވާނުންނަކީ ދުޅަހެޔޮ، ހަށިހެޔޮ އަދި ހުނަރުވެރި ބަޔަކަށް ހެދުމަށްޓަކައި، އެކި ކުޅިވަރުތަކާއި މުނިފޫހިފިލުވުމުގެ ވަސީލަތްތައް ހިމެނޭހެން ގިނަ މަޝްރޫޢުތަކެއް ސަރުކާރުން ފަށާފައިވާ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
”ދަ ޕަލްސް“ ޕޮޑްކާސްޓްގައި ޒުވާނުންގެ ހުރި ކަންބޮޑުވުންތަކާ ގުޅޭގޮތުން ވާހަކަފުޅު ދައްކަވަމުން ރައީސް ވިދާޅުވީ، ޒުވާނުންނަށް ހަރަކާތްތެރިވެވޭނެ ތަންތަން މަދުވުމަކީ އޮތް ބޮޑު ކަންބޮޑުވުމެއް ކަމަށެވެ. އެގޮތުން ކުރިން ވެހިކަލް ގަރާޖެއްގެ ގޮތުގައި ބޭނުންކުރި ތަނެއް، މިހާރު ޒުވާނުންނަށް ފައިދާހުރި ގޮތަކަށް ”ޔޫތު ހަބް“ އެއްގެ ގޮތުގައި ބަދަލުކޮށް، ތަރައްޤީކޮށްފައިވާކަން އެމަނިކުފާނު ފާހަގަކުރެއްވިއެވެ.
ޒުވާނުންނަށް ބޭނުންވާ ވަސީލަތްތައް ޤާއިމްކުރުމަށް ރޭވިފައިވާ ކަންކަމުގެ ތަފްޞީލް ދެއްވަމުން ރައީސް ވިދާޅުވީ، ރާއްޖޭގެ އެއްވެސް ރަށެއް ބާކީނުކޮށް، ކޮންމެ ރަށެއްގައި ޒަމާނީ ފެންވަރުގެ ފިޓްނަސް ރިކްރިއޭޝަން މަރުކަޒުތަކާއި އައުޓްޑޯ ޖިމްތައް ބިނާކުރުމުގެ މަސައްކަތް ބާރު ސްޕީޑުގައި ކުރިއަށްދާ ކަމަށެވެ. އަދި ހުޅުމާލޭގައި ބޯލިން އެރީނާއަކާއި، ނެޓްބޯޅަ ކޮމްޕްލެކްސްއެއްގެ އިތުރުން މާލޭގައި މަތިމައްޗަށް ހުންނަ ފުޓްސަލް ދަނޑުތަކެއް ހިމެނޭ އިމާރާތެއް އެޅުމުގެ މަސައްކަތް މިހާރު ވަނީ ފެށިފައެވެ.
މީގެ އިތުރުން، މާލޭގެ ސަލްޓަން ޕާކުގައި އިންޑޯ އީ-ގޭމިންގ ސެންޓަރެއް އެޅުމުގެ މަސައްކަތާއި، ހުޅުމާލެ ލިންކް ރޯޑް ސަރަޙައްދުގައި ބައިނަލްއަޤްވާމީ ފެންވަރުގެ ރޭސިންގ އަދި ޑްރިފްޓިންގ ޓްރެކެއް ހިމެނޭ ސްޓޭޑިއަމެއް ބިނާކުރުމަށް ބިން ހިއްކުމުގެ މަސައްކަތް ކުރިއަށްދާކަން އެމަނިކުފާނު ހާމަކުރެއްވިއެވެ.
އެގޮތުން، ޒުވާނުންނަކީ ޤައުމު ބިނާކުރުމަށް ސަރުކާރުން ކުރަމުންދާ މަސައްކަތްތަކުގެ އެންމެ މުހިންމު ހިއްސާކަން ފާހަގަކުރެއްވަމުން ރައީސުލްޖުމްހޫރިއްޔާ ވަނީ، އިޤްތިޞާދީ އަދި ތަޢުލީމީ ދާއިރާގެ ތެރެއިން ޒުވާނުން ކުރިއެރުވުމަށް ކުރައްވަމުންގެންދަވާ މަސައްކަތްތަކަށް އަލިއަޅުއްވާލައްވާފައެވެ.ވަކީން ޚާއްޞަކޮށް، ހަށިހެޔޮ، ދުޅަހެޔޮ މުޖުތަމަޢެއް ބިނާކުރުމަށްޓަކައި ޒުވާނުންނަށް ކުޅިވަރުކުޅެވޭނެ ފަހި ފުރުޞަތުތައް މީގެ ކުރިން ރާއްޖެ ދެކެފައި ނުވާ މިންވަރަށް ތަރައްޤީކޮށްދެއްވުމަށް އަދުގެ ސަރުކާރުން މިހާރު ކުރައްވަމުންގެންދަވާ މަސައްކަތްތަކުގެ އަދާހަމަ، އެމަނިކުފާނު ވަނީ ހިއްސާކުރައްވާފައެވެ.
މިފަދަ މަޝްރޫޢުތަކަކީ ހަމައެކަނި ވެރިރަށް، މާލެއަށް ޚާއްޞަ ކަމަކަށްވުމުގެ ބަދަލުގައި، ރާއްޖޭގެ ހުރިހާ ކަންކޮޅުތަކެއްގައި މިފަދަ ޚިދުމަތްތައް ގާއިމުކުރެވެމުންދާކަމުގައި އެމަނިކުފާނު ފާހަގަކުރެއްވިއެވެ. އެގޮތުން 2028 ވަނަ އަހަރުގެ ފުރަތަމަ ކުއާޓަރާ ހިސާބަށް ދެވޭއިރު، މިފަދަ މަޝްރޫޢުތައް ހުންނާނީ ކާމިޔާބުކަމާއެކު ނިންމާލެވިފައިކަމުގެ ޔަޤީންކަން ރައީސުލްޖުމްހޫރިއްޔާ ދެއްވިއެވެ.
