ކަނޑުމަގުން ރާއްޖެއަށް އެތެރެކުރަން އުޅުނު 3 ކިލޯއަށްވުރެ ގިނަ މަސްތުވާތަކެތި މޯލްޑިވްސް ކަސްޓަމްސް ސާވިސްއިން އަތުލައިގެންފިއެވެ.
ކަސްޓަމްސުން ހާމަކުރި ގޮތުގައި، މި ތަކެތި އަތުލައިގަނެފައިވަނީ އިއްޔެގެ ވަގުތެއްގައި މާލެ ކޮމާޝިއަލް ހާބަރުންނެވެ. އަތުލައިގަތް މަސްތުވާތަކެތީގެ ބަރުދަނުގައި ޖުމްލަ 3,110 ގްރާމް (3.11 ކިލޯ) ހުރިއިރު، މި ތަކެތީގެ މަގުމަތީ އަގު 5.6 މިލިއަން ދިވެހި ރުފިޔާއަށް އަރާނެ ކަމަށް އެ އިދާރާއިން ލަފާކުރެއެވެ.
މި މައްސަލައިގައި އަތުލައިގަތް މަސްތުވާތަކެތި ތަހުލީލުކުރިއިރު، އެ ތަކެތި މަސްތުވާތަކެތީގެ ބާވަތެއް ކަމަށްވާ ”ސިންތެޓިކް ކެތިނޯން“ އަށް ޕޮޒިޓިވް ވެފައިވާ ކަމަށްވެސް ކަސްޓަމްސުން މައުލޫމާތު ދެއްވައެވެ.
2026 ޖުލައި 23 ވަނަ ދުވަހު ކަނޑުމަގުން ރާއްޖެއެތެރެކުރަން އުޅުނު 3.1 ކިލޯއަށްވުރެ ގިނަ މަސްތުވާތަކެތި ކަސްޓަމްސްއިން އަތުލައިގެންފި.
🔹ބާވަތް: ސިންތެޓިކް ކެތިނޯން
🔹 ބަރުދަން: 3،110 ގްރާމް
🔹ޖުމްލަ މަަގުމަތީއަގު: 5.6 މިލިއަން ދިވެހި ރުފިޔާއަށް ވުރެ އިތުރު pic.twitter.com/VufDabDkOD— Maldives Customs Service (@CustomsMv) July 23, 2026
މި ފަހަކަށް އައިސް ރާއްޖެއަށް މަސްތުވާތަކެތި އެތެރެކުރުން ހުއްޓުވުމަށް ކަސްޓަމްސުން ކުރަމުންދާ މަސައްކަތްތައް ވަނީ ވަރުގަދަކޮށްފައެވެ. އެގޮތުން، މިދިޔަ ހޮނިހިރު ދުވަހު ވެސް އައްޑޫ ސިޓީގެ ގަން އިންޓަނޭޝަނަލް އެއަރޕޯޓުން ވަނީ ވައިގެމަގުން އެތެރެކުރަން އުޅުނު 5.5 ކިލޯއަށްވުރެ ގިނަ މަސްތުވާތަކެތި އަތުލައިގެންފައެވެ. އެ މައްސަލައިގައި އިންޑިއާއިން ރާއްޖެއަށް އައި ދެ ފަސިންޖަރަކު ވަނީ ހިފަހައްޓާފައެވެ.
ކަނޑުމަގުން މާލެއަށް އެތެރެކުރަން އުޅެނިކޮށް އަތުލައިގަތް މި މަސްތުވާތަކެތީގެ މައްސަލަ އިތުރަށް ތަހުގީގު ކުރުމަށްޓަކައި، އެ ތަކެތި މިހާރު ވަނީ މޯލްޑިވްސް ޕޮލިސް ސާވިސްއާ ހަވާލުކޮށްފައެވެ.
