ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) އިން ދައުލަތުގެ މުހިންމު ހަތަރު ކުންފުންޏެއްގެ ޑިރެކްޓަރުންގެ ބޯޑަށް އައު މެންބަރުން އައްޔަންކުރައްވައިފިއެވެ.
މި ބަދަލުތައް ގެންނަވާފައިވަނީ ސަރުކާރު ހިއްސާވާ ކުންފުނިތަކުގެ ހިންގުން އިތުރަށް ހަރުދަނާކޮށް، މަސައްކަތްތައް ހަލުވިކުރުމުގެ މަގުސަދުގައެވެ. މިގޮތުން ބޯޑަށް މެންބަރުން އައްޔަންކުރެއްވި ކުންފުނިތަކަކީ މޯލްޑިވްސް ޙައްޖު ކޯޕަރޭޝަނާއި، ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) އާއި، އައިލެންޑް އޭވިއޭޝަން ސަރވިސަސް ލިމިޓެޑްގެ އިތުރުން ފަހި ދިރިއުޅުން ކޯޕަރޭޝަން (އެފްޑީސީ) އެވެ.
ޕީސީބީން ހާމަކުރައްވާފައިވާ ގޮތުގައި މި ކުންފުނިތަކުގެ ބޯޑަށް އަލަށް އައްޔަންކުރެއްވި ބޭފުޅުންނަކީ:
- ފަހި ދިރިއުޅުން ކޯޕަރޭޝަން: ޢަބްދުﷲ ޔާމީން، މއ. ޝަހީން
- އައިލެންޑް އޭވިއޭޝަން ސަރވިސަސް ލިމިޓެޑް: މައީޝާ އިބްރާހިމް، ދ. ކުޑަހުވަދޫ، ތިކުރީތު
- ހައުސިންގ ޑިވެލޮޕްމަންޓް ކޯޕަރޭޝަން: ޝާހިދު މޫސާ، ދ. ބަނޑިދޫ، ފެހިވިނަ
- މޯލްޑިވްސް ޙައްޖު ކޯޕަރޭޝަން: އަޙްމަދު މާޒިން، ގ. ބަނީ
ރައީސް މުޢިއްޒުގެ ސަރުކާރުން ދަނީ ދައުލަތުގެ ކުންފުނިތަކަކީ ނަތީޖާ ނެރޭ، ހަރުދަނާ ތަންތަނަށް ހެދުމަށްޓަކައި ގިނަ މަސައްކަތްތަކެއް ކުރައްވަމުންނެވެ. މިގޮތުން ކުންފުނިތަކުގެ ބޯޑުތަކަށް އައްޔަންކުރައްވާ ބޭފުޅުންނަކީ އެ ބޭފުޅަކު އައްޔަންކުރައްވާ ދާއިރާއަކުން މަތީ ތައުލީމާއި ގިނަ ދުވަހުގެ ތަޖުރިބާ ލިބިވަޑައިގެންފައިވާ ގާބިލު ބޭފުޅުންކަން ޕީސީބީން ފާހަގަކުރެއެވެ.
މި އައްޔަންކުރެއްވުންތަކާއެކު، ކުންފުނިތަކުގެ ހިންގުމަށް އިތުރު ކުރިއެރުމެއް ލިބި، ރައްޔިތުންނަށް ފޯރުކޮށްދޭ ޚިދުމަތްތައް އިތުރަށް ފުރިހަމަވެގެންދާނެ ކަމަށް ސަރުކާރުން އުންމީދު ކުރައްވައެވެ.
