މާލޭގެ ބޮޑުތަކުރުފާނުމަގުން އަލަށް ތަރައްޤީކުރި ސަރަހައްދުގެ މަސައްކަތްތައް ނިމި، މާދަމާ ހަވީރު އާންމުންނަށް ހުޅުވާލުމަށް ނިންމައިފިއެވެ. މިކަން ހާމަކުރެއްވީ އިމާރާތްކުރުމާއި ބިނާރާ ބެހޭ ވަޒީރު ޑރ. ޢަބްދުﷲ މުއްޠަލިބެވެ.
ވަޒީރު ޑރ. މުއްޠަލިބު މިކަން ހާމަކުރެއްވީ ބޮޑުތަކުރުފާނުމަގުގައި އަލަށް ތަރައްޤީކޮށްފައިވާ ޕާކިން ޒޯނު ސަރަހައްދުގައި ގަސް އިންދުމަށް މިއަދު ބޭއްވި ހަރަކާތަކަށްފަހު މީޑިއާތަކާ ވާހަކަދައްކަވަމުންނެވެ. ވަޒީރު ވިދާޅުވީ، މަގުގެ މަސައްކަތްތައް އެއްކޮށް ނިމި، މާދަމާ ހަވީރު 4:00 އިން ފެށިގެން އާންމުންނަށް ދަތުރުފަތުރު ކުރުމަށް މަގު ހުޅުވާލާނެ ކަމަށެވެ.
”ދެން އަޅުގަނޑުމެންގެ ވިސްނުމަކީ މަސައްކަތް ނިމުމާއެކު މާދަމާ ހަވީރު ހަތަރަކުން ފެށިގެން އާންމުންނަށް މަގު ހުޅުވާލުން. ވަކި ރަސްމިއްޔާތެއް ބާއްވާ ގޮތަކަށް ނޫން އޮތީކީ. އަޅުގަނޑުމެން މަގުގެ މަސައްކަތް ނިމުމާއެކު މާދަމާ ހަވީރު ހަތަރަކުން ފެށިގެން އާންމުންނަށް މަގު ބޭނުންކުރެވޭ ވަރަށް ހުޅުވާލާނަން،“ ވަޒީރު ވިދާޅުވިއެވެ.
މަގު ހުޅުވާލުމުގެ ކުރިން ކުރިއަށްގެންދިޔަ ގަސް އިންދުމުގެ ހަރަކާތަކީ، މަގު ހެދުމުގެ މަސައްކަތް ނިމުމާއެކު ރައްޔިތުންނަށް ވީހާވެސް ހިތްފަސޭހަ، މާލޭގެ މަލަމައްޗަށް ތަނަވަސްކަން ގެނެވޭނެ ގޮތަކަށް މަސައްކަތްތައް ކުރިއަށް ގެންދިޔުމަށް ހިންގި ހަރަކާތެއްކަން ވަޒީރު ފާހަގަކުރެއްވިއެވެ. އެގޮތުން މިހާރު ގަސް އިންދާފައި ހުރި ސަރަހައްދުތަކުގައި ރުއް އިންދުމާއި، ތަފާތު މާމެލާމެލީގެ ގަސްތައް އިންދައިގެން މަގުތައް ފެހިކުރުމުގެ މަސައްކަތް ކުރިއަށް އޮތްތަނުގައިވެސް ބާރަށް ކުރިއަށްދާނެ ކަމަށް ވަޒީރު ވިދާޅުވިއެވެ.
ބޮޑުތަކުރުފާނުމަގު ޒަމާނީ ފެންވަރަށް ތަރައްޤީކުރުމުގެ މަސައްކަތުގެ އިތުރުން، މުޅި މާލެއާއި ވިލިމާލޭގެ މަގުތައް ތަރައްޤީކުރުމުގެ ބިޔަ މަޝްރޫއަށްވެސް ސަރުކާރުން ދަނީ ތައްޔާރުވަމުންނެވެ. ޗައިނާ ސަރުކާރުގެ ހިލޭ އެހީގެ ދަށުން ކުރިއަށްގެންދާ މި މަޝްރޫއުގެ ސާވޭގެ މަސައްކަތްތައް މިހާރު ވަނީ ފަށާފައެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން އަމާޒު ހިފާފައިވަނީ މާލޭގެ މަގުތަކަކީ ހިނގާބިނގާވެ އުޅޭ މީހުންނާއި ދުއްވާ އެއްޗެއްސަށް ރައްކާތެރި، ހިތްފަސޭހަ ތަންތަނަށް ހެދުމަށެވެ.
ބޮޑުތަކުރުފާނުމަގުގެ މި ސަރަހައްދު ހުޅުވާލުމާއެކު މާލޭގެ އިރުމަތީ ފަރާތުގެ ދަތުރުފަތުރަށް ބޮޑު ލުޔެއް ލިބިގެންދާނެއެވެ.
