ގްލޯބަލް އިންޑިއާ ބިޒްނަސް ފޯރަމްގެ ފަރާތުން އިންތިޒާމްކޮށްގެން ބާއްވާ ”އިންޑިޔާ – އޭޝިޔާ ބިޒްނަސް ކޮންކްލޭވް 2026“ އަދި ”އިކޯ ސަސްޓެއިން އެކްސްޕޯ 2026“ ގައި ބައިވެރިވުމުގެ ފުރުސަތު ދިވެހިރާއްޖޭގެ ވިޔަފާރި ކުންފުނިތަކަށް ހުޅުވާލާފައިވާ ކަމަށް މިނިސްޓްރީ އޮފް އިކޮނޮމިކް ޑިވެލޮޕްމަންޓް، ޓްރާންސްޕޯޓް އެންޑް ޓްރޭޑުން މިއަދު ބުނެފިއެވެ.
މި ބޮޑު ކޮންކްލޭވްގެ ހަތަރު ވަނަ އެޑިޝަން ބޭއްވުމަށް ހަމަޖެހިފައިވަނީ އިންޑިޔާގެ ހައިދަރުއާބާދުގައެވެ. މި ހަރަކާތް ކުރިއަށްދާނީ 2026 ވަނަ އަހަރުގެ ޖުލައި 31 އިން އޯގަސްޓް 1 ގެ ނިޔަލަށެވެ.
އިކޮނޮމިކް މިނިސްޓްރީން މައުލޫމާތު ދޭ ގޮތުގައި، އިންޑިއާ- އޭޝިޔާ ބިޒްނަސް ކޮންކްލޭވް އަކީ މި ސަރަހައްދުގައި ބޭއްވޭ ބައިނަލްއަގުވާމީ ވިޔަފާރިތައް އެއްތަނަކުން ގުޅުވާލަދޭ އެންމެ މުހިންމު އެއް ޕްލެޓްފޯމެވެ. މި މައުރަޒުގައި އިންޑިއާގެ 500 އަށް ވުރެ ގިނަ ވިޔަފާރި ކުންފުނިތަކާއި، ބައިނަލްއަގުވާމީ ވިޔަފާރި ވަފުދުތަކާއި، ސިޔާސަތު ކަނޑައަޅާ ފަރާތްތަކުގެ އިތުރުން ސަރުކާރުތަކުގެ މަންދޫބުންނާއި ޑިޕްލޮމެޓުން ބައިވެރިވާނެއެވެ. އަދި އޭޝިޔާ ސަރަހައްދުގެ 20 އަށް ވުރެ ގިނަ ގައުމުން ވިޔަފާރިވެރިން މި ބައްދަލުވުމުގައި ބައިވެރިވާނެ ކަމަށްވެސް އެ މިނިސްޓްރީން ބުނެއެވެ.
މި ކޮންކްލޭވްގައި ބައިވެރިވާ ދިވެހި ވިޔަފާރިތަކަށް ގިނަގުނަ ފައިދާތަކެއް ލިބިގެންދާނެއެވެ.
އޭގެ ތެރޭގައި، ބައިނަލްއަގުވާމީ ވިޔަފާރި ނެޓްވޯކިން ފުރުސަތުތައް ހޯދުން، އިންވެސްޓްމަންޓް އަދި ޖޮއިންޓް ވެންޗަރ ފުރުސަތުތައް ދެނެގަތުން، ސެކްޓަރ ބޭސްޑް ސެޝަންތަކާއި ޕެނަލް ޑިސްކަޝަންތަކުގައި ބައިވެރިވުން، އިންޑިއާގެ މެނިފެކްޗަރުން ނާއި އެކްސްޕޯޓަރުން އަދި ޓެކްނޮލޮޖީ ފޯރުކޮށްދޭ ފަރާތްތަކާ ބައްދަލުކުރުމުގެ އިތުރުން ދިވެހި އުފެއްދުންތަކާއި ޚިދުމަތްތައް ބައިނަލްއަގުވާމީ މާކެޓަށް ދައްކާލުން ހިމެނެއެވެ.
މީގެ އިތުރުން، އިންފްރާސްޓްރަކްޗަރ، ޓޫރިޒަމް، ރިނިއުއަބަލް އެނަރޖީ، ހެލްތްކެއަރ، އެޑިއުކޭޝަން އަދި ލޮޖިސްޓިކްސް ފަދަ މުހިންމު ދާއިރާތަކުން ސްޓްރެޓެޖިކް ޕާޓްނަރޝިޕްތައް ބިނާކުރުމުގެ ފުރުސަތުވެސް މި ބައްދަލުވުމުގެ ތެރެއިން ފަހިވެގެންދާނެއެވެ.
މި މައުރަޒުގައި ބައިވެރިވުމަށް ޝައުގުވެރިވާ ފަރާތްތަކުން، އިންތިޒާމްކުރާ ފަރާތުން ކަނޑައަޅާފައިވާ ގޫގުލް ފޯމް ފުރިހަމަކުރެއްވުމަށް އިކޮނޮމިކް މިނިސްޓްރީން އިރުޝާދު ދެއްވައެވެ. އިތުރު މައުލޫމާތު ހޯއްދެވުމަށް މި ފޯރަމްގެ ރަސްމީ ވެބްސައިޓް ބައްލަވާލެއްވުމަށް ނުވަތަ deepali.gadkari@gibf.biz އަށް އީމެއިލް ކުރެއްވުމަށް މިނިސްޓްރީން ވަނީ އެދިފައެވެ.
