ޕްރައިވެޓައިޒޭޝަން އެންޑް ކޯޕަރޭޝަން ބޯޑުން ބިޒްނަސް ސެންޓާ ކޯޕަރޭޝަން، މޯލްޑިވްސް ފަންޑް މެނޭޖްމަންޓް ކޯޕަރޭޝަން އަދި މިފްކޯގެ ބޯޑަށް އާ މެމްބަރުންތަކެއް އައްޔަންކޮށްފިއެވެ.
ދައުލަތުގެ ހިއްސާ އޮންނަ ތިން ކުންފުންޏެއްގެ ބޯޑަށް ޕީސީބީއިން އާ މެމްބަރުންތަކެއް އައްޔަންކޮށްފައިވާއިރު، އެ ކުންފުނިތަކަކީ ބިޒްނަސް ސެންޓާ ކޯޕަރޭޝަން، މޯލްޑިވްސް ފަންޑް މެނޭޖްމަންޓް ކޯޕަރޭޝަން ލިމިޓެޑް، އަދި މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ، މިފްކޯއެވެ.
މިގޮތުން، މިފްކޯގެ ބޯޑު މެމްބަރު ކަމަށް ސ. ފޭދޫ، އާބާދީގެ، ފާތިމަތު އާޒިޔާ ފަތުހީ އައްޔަންކޮށްފައިވެއެވެ. އަދި އެމްއެފްއެމްސީގެ ބޯޑަށް ހއ. ތަކަންދޫ، ރަތްވިލާގެ، ހުސައިން އަބްދުލްވާހިދު އައްޔަންކުރިއިރު، ބީސީސީގެ ބޯޑު މެމްބަރުކަމަށް އައްޔަންކޮށްފައިވަނީ ސ. ހިތަދޫ، މީނާޒް، އީނާސް ނަސީރެވެ.
މި ބަދަލުތައް ގެނެސްފައި މިވަނީ ސަރުކާރު ހިއްސާވާ ކުންފުނިތައް ހިންގުން ހަރުދަނާކުރުމަށް ސަރުކާރުން ކުރަމުންދާ މަސައްކަތްތަކުގެ ތެރެއިންނެވެ. މިގޮތުން، މި ކުންފުނިތަކުގެ މުވައްޒަފުންގެ އަދަދު 33 އިންސައްތަ މަދުކުރުމަށް މީގެ ކުރިން ސަރުކާރުން ވަނީ އަންގާފައެވެ.
މި މަސައްކަތް ތިން މަސް ދުވަހުގެ ތެރޭގައި ނިންމުމަށް ކުންފުނިތަކަށް އައު މުހުލަތެއް ދީފައިވާއިރު، މިއީ ސަރުކާރުގެ ޚަރަދުތައް ކުޑަކުރުމަށް އަޅަމުންދާ މުހިންމު ފިޔަވަޅުތަކެއް ކަމަށް ކަމާބެހޭ ފަރާތްތަކުން ހާމަކުރެއެވެ.
ދަރަނި ބޮޑުވެފައިވާ މި ދަނޑިވަޅުގައި، ދައުލަތުގެ ޚަރަދުތައް ކުޑަކުރުމަކީ ސަރުކާރުގެ އެންމެ އިސް އެއް އަމާޒެވެ. ފިނޭންސް މިނިސްޓްރީގެ ތަފާސްހިސާބުތައް ދައްކާ ގޮތުން، ސަރުކާރު ކުންފުނިތަކުގައި ގާތްގަނޑަކަށް 42،000 މުވައްޒަފުން މަސައްކަތް ކުރެއެވެ. މިއީ ހަތަރު ލައްކައެއްހާ މީހުންގެ އާބާދީއެއް އޮންނަ ރާއްޖޭގެ ސިވިލް ސާވިސްގައި ތިބި 30،000 އަށްވުރެ ގިނަ މުވައްޒަފުންނާ އަޅާބަލާއިރު ބޮޑު އަދަދެކެވެ.
