އެކި ސަބަބުތަކާހުރެ ބޭއްވުން ލަސްވަމުންދިޔަ ދެކުނު އޭޝިއާ ސަރަހައްދުގެ އެންމެ ޝަރަފުވެރި ފުޓުބޯޅަ މުބާރާތް، ސާފް ޗެމްޕިއަންޝިޕް އަންނަ ނޮވެމްބަރު މަހުގެ ކުރީކޮޅު ބޭއްވުމަށް ނިންމައި ތާވަލު އިއުލާނުކޮށްފިއެވެ.
ސާފް އިން ހާމަކޮށްފައިވާ ގޮތުގައި، 15 ވަނަ ސާފް ޗެމްޕިއަންޝިޕް ކުރިއަށްދާނީ ބަންގްލަދޭޝްގެ ވެރިރަށް ޑާކާގައެވެ. މި މުބާރާތް އޮންނާނީ އަންނަ ނޮވެމްބަރު މަހުގެ 4 އިން 17 ވަނަ ދުވަހުގެ ނިޔަލަށެވެ. މިއީ 2018 ވަނަ އަހަރަށްފަހު ބަންގްލަދޭޝްގައި މި މުބާރާތް ބާއްވާ ފުރަތަމަ ފަހަރެވެ.
މި މުބާރާތުގެ ތައްޔާރީތަކާ ގުޅޭގޮތުން ސާފް އިން ބުނީ، މުބާރާތުގެ ލޯގޯ އިފްތިތާހުކުރުމުގެ ޚާއްޞަ ހަފްލާއެއް މި މަހުގެ 25 ވަނަ ދުވަހު ޑާކާގައި ބޭއްވުމަށް ހަމަޖެހިފައިވާ ކަމަށެވެ. އަދި މުބާރާތުގައި ވާދަކުރާ ޓީމުތައް ގްރޫޕްތަކަށް ބަހާލުމަށް ބާއްވާ ގުރުނެގުމުގެ ރަސްމިއްޔާތު އޮންނާނީ އަންނަ އޮގަސްޓް މަހުގެ 1 ވަނަ ދުވަހު، ބޫޓާނުގެ ތިމްފޫގައެވެ.
ސާފްގެ ސެކްރެޓޭރިއަޓުން އުންމީދު ކުރަނީ މިފަހަރުގެ މުބާރާތުގައި ސަރަހައްދުގެ ހުރިހާ މެމްބަރު ގައުމުތަކަކުން ވެސް ބައިވެރިވާނެ ކަމަށެވެ. ”މިއީ ސަރަހައްދީ އެންމެ ހައިބަތުބޮޑު މުބާރާތް ކަމާއި މިއީ މި ސަރަހައްދުގެ ގައުމުތަކުން އެންމެ ބޮޑަށް އިންތިޒާރުކުރާ މުބާރާތްކަމަށް ގަބޫލުކުރަން،“ ސާފް އިން ނެރުނު ބަޔާނުގައިވެއެވެ.
ބަންގްލަދޭޝްގައި އެންމެ ފަހުން 2018 ވަނަ އަހަރު ބޭއްވި ސާފް ޗެމްޕިއަންޝިޕުގެ ތަށި އުފުލާލީ ދިވެހިރާއްޖެއިންނެވެ. އެއީ ރާއްޖެއިން މި މުބާރާތުގެ ޗެމްޕިއަންކަން ހޯދި ދެވަނަ ފަހަރެވެ. ރާއްޖެއިން ވަނީ 2008 ވަނަ އަހަރާއި 2021 ވަނަ އަހަރު މި މުބާރާތް ހޯސްޓުކޮށްފައެވެ.
އެންމެ ފަހުން 2023 ވަނަ އަހަރު އިންޑިއާގައި ބޭއްވި މުބާރާތުގައި، މި ސަރަހައްދުގެ ގައުމުތަކުގެ އިތުރުން ކުވެއިތާއި ލުބުނާން ވެސް ވާދަކުރިއެވެ. އެ ފަހަރުގެ ޗެމްޕިއަންކަން ހޯދާފައިވަނީ މުބާރާތުގެ އެންމެ ކާމިޔާބު ޓީމު ކަމަށްވާ އިންޑިއާއިންނެވެ.
