ސްޕެޝަލް ކޮންސްޓަބިއުލަރީގެ މަސައްކަތްތަކަށް އަލަށް ގުޅޭ މުވައްޒަފުން ތަމްރީނުކުރުމަށް ބާއްވާ ”ސްޕެޝަލް ކޮންސްޓަބިއުލަރީ އަސާސީ ތަމްރީނު ކޯސް“ ގެ 9 ވަނަ ބުރު އައްޑޫ ސިޓީގައި ރަސްމީކޮށް ފަށައިފިއެވެ.
އައްޑޫ ސިޓީގައި ހުންނަ ނޭޝަނަލް ކޮލެޖް އޮފް ޕޮލީސިންގ އެންޑް ލޯ އެންފޯސްމަންޓްގައި މި މަހުގެ 21 ވަނަ ދުވަހު ބޭއްވި ރަސްމިއްޔާތެއްގައި މި ކޯސް ފައްޓަވައިދެއްވީ ނޭޝަނަލް ކޮލެޖް އޮފް ޕޮލިސިންގ އެންޑް ލޯ އެންފޯސްމަންޓްގެ ހެޑް އޮފް ރަޖިސްޓްރޭޝަން އެންޑް ސްޓޫޑަންޓް ސާވިސަސް، ޗީފް އިންސްޕެކްޓަރ އޮފް ޕޮލިސް މުޙައްމަދު އަޙްމަދު ރަޝީދު އެވެ.
މި ކޯހަކީ ސްޕެޝަލް ކޮންސްޓަބިއުލަރީގެ މަސައްކަތްތަކާ އަލަށް ގުޅޭ މުވައްޒަފުންނަށް ބޭނުންވާ އަސާސީ ތަމްރީނާއި ތަރުބިއްޔަތު ދީ، ރައްޔިތުންނަށް ފެންވަރު ރަނގަޅު ޚިދުމަތެއް ފޯރުކޮށްދިނުމަށް އެ ފުލުހުން ތައްޔާރުކުރުމުގެ މަގްސަދުގައި ކުރިއަށްގެންދާ ކޯހެކެވެ.
ހަތަރު ހަފްތާގެ މުއްދަތަށް ކުރިއަށްގެންދާ މި ތަމްރީނު ކޯހުގައި ޖުމްލަ 22 ދަރިވަރުން ބައިވެރިވެފައިވެއެވެ. އޭގެ ތެރޭގައި ހިމެނެނީ 16 ފިރިހެން ދަރިވަރުންނާއި 06 އަންހެން ދަރިވަރުންނެވެ.
މި ކޯހުގެ މުއްދަތުގައި ދަރިވަރުންނަށް އިންޑޯރ އަދި އައުޓްޑޯރ މާއްދާތައް ހިމެނޭހެން ޖުމްލަ 06 މޮޑިއުލްއެއް ކިޔަވައިދިނުމަށް ވަނީ ހަމަޖެހިފައެވެ. އޭގެ ތެރޭގައި ވަޒީފާގެ މަސްއޫލިއްޔަތު އެދެވޭ ގޮތެއްގައި އަދާކުރުމަށް ބޭނުންވާ އަސާސީ ތަމްރީނުތަކާއި، މުހިންމު ހުނަރުތަކާއި، އިލްމު އަދި މުއާމަލާތު ކުރުމުގެ ހުނަރުތައް ހިމެނެއެވެ.
މީގެ އިތުރުން ޖިސްމާނީ ދުޅަހެޔޮކަމާއި، ޑްރިލް، ބާރުގެ ބޭނުންކުރުން، ދިފާއީ އުކުޅުތައް، ފުރަތަމަ އެހީ، އަދި އަލިފާން ނިއްވުމުގެ އަސާސީ ހުނަރުތައް ދަރިވަރުންނަށް އުނގަންނައިދެވޭނެއެވެ. އަދި ގާނޫނާއި ގަވާއިދުތަކަށް އަހުލުވެރިކުރުވުމާއި، މަސައްކަތުގެ އަހުލާގާއި ސެކިއުރިޓީއާ ގުޅޭ ތަފާތު އުކުޅުތައް މި ކޯހުގެ ތެރެއިން ދަސްކޮށްދިނުމަށް ވަނީ ރޭވިފައެވެ.
