ޅ. ނައިފަރުގެ ބިމުގެ ދަތިކަމަށް ދާއިމީ ޙައްލެއް ހޯދުމަށްޓަކައި ސަރުކާރުން ކުރިއަށްގެންދިޔަ 45 ހެކްޓަރުގެ ބިން ހިއްކުމުގެ މަޝްރޫޢުގެ މަސައްކަތް ކާމިޔާބުކަމާއެކު ނިންމާލައިފިއެވެ.
މި ބިޔަ މަޝްރޫޢަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިދިޔަ އަހަރުގެ އޮކްޓޯބަރު މަހު ނައިފަރަށް ކުރެއްވި ދަތުރުފުޅުގައި ރަސްމީކޮށް ފަށްޓަވައިދެއްވި މަސައްކަތެކެވެ. މި މަސައްކަތް ސަރުކާރުން ހަވާލުކޮށްފައިވަނީ މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އާއެވެ.
މި މަޝްރޫޢުގެ ދަށުން މިހާރު ކުރިއަށްދަނީ ހިއްކި ބިން ހިމާޔަތްކުރުމުގެ މުހިންމު މަސައްކަތްތަކެވެ. އެގޮތުން ގޮނޑުދޮށް ހިމާޔަތްކުރުމުގެ މަސައްކަތުގެ 24 އިންސައްތަ މިހާރު ވަނީ ނިމިފައެވެ. މިވަގުތު އެންމެ ބާރަށް ކުރިއަށްދަނީ ރިވެޓްމެންޓް ޖެހުމުގެ މަސައްކަތެވެ. ބިން ހިމާޔަތްކުރުމުގެ މި މަސައްކަތުގެ ދަށުން 1813 މީޓަރުގެ ބޮޑު ހިލައިގެ ރިވެޓްމަންޓް ޖެހުމާއި، 803 މީޓަރުގެ ބޮޑު ހިލައިގެ ބޭރު ތޮށިލުމުގެ އިތުރުން 474 މީޓަރުގެ ބޮޑު ހިލައިގެ ގްރޮއިން ޖެހުމަށް ވަނީ ހަމަޖެހިފައެވެ.
ނައިފަރަކީ 5،800 އަށްވުރެ ގިނަ މީހުންގެ އާބާދީއެއް އޮތް، އަދި ސަރުކާރުން ”އަރބަން ސެންޓަރެއް“ގެ ގޮތުގައި ތަރައްޤީކުރަން ކަނޑައަޅާފައިވާ މުހިންމު ރަށެކެވެ. ކުރިން 55 ހެކްޓަރުގެ ބޮޑުމިން ހުރި މި ރަށުގައި، މީގެ ކުރިން 2004 ވަނަ އަހަރު 16 ހެކްޓަރުގެ ބިން އަދި ފަހުން 21 ހެކްޓަރުގެ ބިން ހިއްކުމުގެ މަސައްކަތް ކުރިއަށް ގެންގޮސްފައިވެއެވެ. ނަމަވެސް، ރަށުގެ އާބާދީ އިތުރުވަމުންދިއުމާއި، ސަރަޙައްދީ ފެންވަރުގައި އިޤްތިޞާދީ އަދި އިޖުތިމާޢީ މަރުކަޒަކަށް އެރަށް ހެދުމަށްޓަކައި އިތުރު ބިން ބޭނުންވާތީ، ސަރުކާރުން ނިންމެވީ އިތުރު 45 ހެކްޓަރުގެ ބިން ހިއްކުމަށެވެ.
މި މަޝްރޫޢު ނިމުމާއެކު، ނައިފަރުގެ ރައްޔިތުންނަށް ދިމާވެފައިވާ ބޯހިޔާވަހިކަމުގެ މައްސަލައަށް ބޮޑު ލުޔެއް ލިބި، ރަށުގެ އިޤްތިޞާދީ ކުރިއެރުމަށް ބޭނުންވާ ޖާގަ ތަނަވަސްވެގެންދާނެއެވެ.
