އެމެރިކާއާއި އީރާނާ ދެމެދު ކުރަމުންދާ ހަނގުރާމަ އިޒްރޭލުގެ ބޯޑަރާ އިންތިހާއަށް ކައިރިވެ، އީރާނުން އުރުދުންގެ ދެކުނުގައިވާ އަޤަބާއަށް ފޮނުވާލި ބެލިސްޓިކް މިސައިލްތަކެއް އިޒްރޭލުގެ އީލާތު ސަރަހައްދުގެ ވައިގެ ތެރޭގައި ގޮއްވާލުމާ ގުޅިގެން އިޒްރޭލުގެ އަސްކަރިއްޔާ އިންތިހާ ނުރައްކަލުގެ ޙާލަތަކަށް އަތުވެއްޖެއެވެ.
އީރާނުގެ އައި.އާރު.ޖީ.ސީ އިން 4 ބެލިސްޓިކް މިސައިލް ފޮނުވާލާފައިވަނީ އިޒްރޭލުގެ އީލާތާ ދާދި ކައިރީގައި އޮންނަ އުރުދުންގެ އަޤަބާގައި ހުރި އެމެރިކާގެ އަސްކަރީ ވަޞީލަތްތަކަށެވެ. އެމެރިކާ އާއި އުރުދުންގެ ދިފާޢީ ނިޒާމުތަކުން ވަނީ އީރާނުގެ 3 މިސައިލެއް ވައިގެ ތެރޭގައި ގޮއްވާލާފައެވެ. އަދި 4 ވަނަ މިސައިލް ވެއްޓުނީ މީހުން ނޫޅޭ ފަޅު ސަރަހައްދަކަށެވެ.
ވައިގެ ތެރޭގައި ގޮއްވާލި މިސައިލްތަކުގެ އެކި ބައިތަކާއި ކުނިބުނިތައް އިޒްރޭލުގެ އީލާތުގެ އުތުރަށް ވެއްޓެން އުޅުމުން، އިޒްރޭލުގެ ’އަޔަން ޑޯމް‘ ނިޒާމުން ވަނީ އެ ތަކެތި ވައިގެ ތެރެއަށް މިސައިލް ފޮނުވައިގެން ހަލާކުކޮށްލާފައެވެ. މި ޙާދިސާއާ ގުޅިގެން އިޒްރޭލުގެ ދިފާޢީ ވަޒީރު އިސްރާއީލް ކާޓްޒް ވަނީ، އީރާނުން ސީދާ އިޒްރޭލުގެ އެއްވެސް ތަނަކަށް ޙަމަލާއެއް ދީފިނަމަ، އެމީހުންގެ މިސައިލް ފޮނުވާ ސައިޓްތަކަށް ސީދާ ”މުޅި ބާރާއެކު“ ރައްދު ޙަމަލާދީ ފުނޑުފުނޑުކޮށްލާނެ ކަމުގެ ވަރުގަދަ އިންޒާރެއް ދީފައެވެ.
