ހުޅުމާލޭގައި ހުންނަ މަސްޖިދުލް ޢަޒީޒާ މޫސާ މިސްކިތުގެ ދޮރުގެ ބިއްލޫރިގަނޑު ތަޅާލައި، އެ މިސްކިތަށް ގެއްލުން ދިން މައްސަލާގައި ތުހުމަތު ކުރެވެނީ ނަފްސާނީ ބަލިމީހަކަށް ކަމަށް ދިވެހި ފުލުހުންގެ ހިދުމަތުން ހާމަކޮށްފިއެވެ.
ފުލުހުން މައުލޫމާތު ދީފައިވާ ގޮތުގައި، މިސްކިތުގެ ބިއްލޫރިގަނޑު ތަޅާލައި ގެއްލުން ދީފައިވާ މައްސަލަ ރިޕޯޓުކޮށްފައިވަނީ 2026 ޖުލައި 20 ވީ އާދިއްތަ ދުވަހުގެ ފަތިހު 3:47 އެހައިކަންހާއިރުއެވެ. މި މައްސަލައިގެ ތަހުގީގަށް މިހާތަނަށް ބެލި ބެލުމުން، އެކަން ކުރި މީހާ ދެނެގަނެވިފައިވާ ކަމަށް ފުލުހުން ބުނެއެވެ.
މި މައްސަލައާއި ގުޅިގެން ’އެކިއެމްވީ‘ އިން ސުވާލުކުރުމުން ފުލުހުންގެ އިސްވެރިޔަކު ވިދާޅުވީ އެއީ ނަފްސާނީ ބަލި މީހެއްކަމަށް މަޢުލޫމާތު ލިބޭ ކަމަށެވެ.
”ތިކަން ކުރިކަމަށްވަނީ ނަފްސާނީ މައްސަލަ ހުންނަ މީހެއް“ ފުލުހުންގެ އިސް އޮފިސަރު ވިދާޅުވިއެވެ.
މި މައްސަލައާ ގުޅިގެން ތަކުރާރުކޮށް ނޫސްވެރިން ސުވާލުކުރުމުން ފުލުހުން މީޑިއާ ގްރޫޕަށް ފޮނުވި މެސެޖެއްގައި ބުނީ، ތުހުމަތުކުރެވޭ ފަރާތުގެ ހާލަތަށް ރިއާޔަތްކޮށް، ކަމާބެހޭ އިދާރާތަކާ ގުޅިގެން ކުރަންޖެހޭ މަސައްކަތްތައް މިހާރު ކުރަމުންދާ ކަމަށެވެ. އަދި މިސްކިތްތަކުގެ ހުރުމަތާއި ރައްކާތެރިކަން ކަށަވަރުކުރުމަށްޓަކައި އަޅަންޖެހޭ ފިޔަވަޅުތައް އެޅުމުގެ މަސައްކަތްވެސް ކުރިއަށްދާ ކަމަށް ފުލުހުން ފާހަގަކުރިއެވެ.
ފުލުހުން ގެންދަނީ މި މައްސަލަ އިތުރަށް ތަހުގީގު ކުރަމުންނެވެ.
