ހއ. ދިއްދޫގައި ސަރުކާރުން ކުރިއަށްގެންދާ 75 ހައުސިން ޔުނިޓު އިމާރާތްކުރުމުގެ މަޝްރޫއުގެ ބޮޑު ބައެއް ނިމި، އަމަލީ މަސައްކަތުގެ 98.55 އިންސައްތަ ފުރިހަމަކޮށްފިއެވެ.
ޑިޒައިން އެންޑް ބިލްޑް އުސޫލުން އެސްޖޭ ކޮންސްޓްރަކްޝަންއާ ހަވާލުކޮށްގެން ކުރިއަށްގެންދާ މި މަޝްރޫއަކީ 2022 ވަނަ އަހަރުގެ އޮގަސްޓު މަހުގެ ތެރޭގައި އަމަލީ މަސައްކަތް ފެށި މަޝްރޫއެކެވެ. ޖުމްލަ 120 މިލިއަން ރުފިޔާ ހޭދަކޮށްގެން ކުރިއަށްގެންދާ މި މަޝްރޫއުގެ ދަށުން މިހާރު ކުރިއަށްދަނީ އިމާރާތްތަކުގެ ބަދިގެއާއި ފާޚާނާތަކުގެ ފިނިޝިންގ މަސައްކަތްތަކެވެ.
މި މަޝްރޫއުގެ ދަށުން ދިއްދޫގައި ބިނާކޮށްފައިވަނީ ދެ ފަންގިފިލާގެ ރޯހައުސްތަކެކެވެ. ކޮންމެ ރޯހައުސްއެއްގައި ތިން ކޮޓަރި، ތިން ފާޚާނާ، ސިޓިންގ ރޫމް، ބަދިގެ، ކާގެ، ލޯންޑްރީ އަދި ސްޓޯރޫމެއް ހިމެނެއެވެ. މިއީ އެ ރަށުގައި ދިމާވެފައިވާ ބޯހިޔާވަހިކަމުގެ މައްސަލައަށް ބޮޑު ލުޔެއް ލިބިގެންދާނެ މަޝްރޫއެއްގެ ގޮތުގައި ފާހަގަކުރެވެއެވެ.
މީގެ އިތުރުން، މި ހައުސިން ޔުނިޓުތަކުގައި ދިރިއުޅޭ ރައްޔިތުންނަށް ހިތްފަސޭހަ މާހައުލެއް ގާއިމުކޮށްދިނުމުގެ ގޮތުން، އެ ސަރަހައްދު ވަށައިގެން އަލިކުރުމުގެ މަސައްކަތް ކުރެވޭނެއެވެ. އަދި އެ ސަރަހައްދުގައި ޕާކަކާއި ވެހިކަލް ޕާކުކުރާނެ ޚާއްސަ ޒޯނެއްވެސް ގާއިމުކުރުމަށް ވަނީ ހަމަޖެހިފައެވެ.
ސަރުކާރުން އަންނަނީ ރަށްރަށުގައި ހުރި މިފަދަ ބޯހިޔާވަހިކަމުގެ މަޝްރޫއުތައް އަވަހަށް ނިންމައި، ރައްޔިތުންނަށް ހަވާލުކުރުމަށް ބާރުއަޅަމުންނެވެ. މި މަޝްރޫއު ނިމުމުން ދިއްދޫގެ ގިނަ އާއިލާތަކަކަށް ރައްކާތެރި އަދި ފެންވަރު ރަނގަޅު ބޯހިޔާވަހިކަމެއް ކަށަވަރުވެގެންދާނެއެވެ.
