މިއަހަރުގެ ޖަނަވަރީ މަހުން ފެށިގެން ޖޫން މަހުގެ ނިޔަލަށް، ބޭސްފަރުވާގެ އެހީގެ ގޮތުގައި ނޭޝަނަލް ސޯޝަލް ޕްރޮޓެކްޝަން އެޖެންސީ (އެންސްޕާ) އިން 90.1 މިލިއަން ރުފިޔާ ދޫކޮށްފިއެވެ. މިކަން ހާމަވެފައިވަނީ މައުލޫމާތު ހޯދައި ލިބިގަތުމުގެ ހައްގުގެ ގާނޫނުގެ ދަށުން ރާއްޖޭގެ ނޫހަކުން އެދުމުން އެ އިދާރާއިން ހިއްސާކުރި ތަފާސްހިސާބުތަކުންނެވެ.
އެންސްޕާގެ ތަފާސްހިސާބުތަކުން ދައްކާގޮތުގައި، މިއަހަރުގެ ފުރަތަމަ ހަ މަސް ދުވަހުގެ ތެރޭގައި މެޑިކަލް ވެލްފެއާ އެހީގެ ގޮތުގައި ޖުމްލަ 90,118,739.77 (ނުވަދިހަ މިލިއަން އެއްލައްކަަ އަށާރަހާސް ހަތްސަތޭކަ ތިރީސްނުވަ ރުފިޔާ ހަތްދިހަ ހަތް ލާރި) ވަނީ ދޫކޮށްފައެވެ. މިއީ ސިއްހީ ފަރުވާ ހޯދުމުގައި އާސަންދައިން ފޯރުކޮށްދޭ އެހީތެރިކަމުގެ އިތުރަށް، އެހީތެރިކަން ބޭނުންވި މީހުންނަށް ދީފައިވާ ފައިސާއެވެ.
މި ތަފާސްހިސާބުތަކަށް ބަލާއިރު، 2018 ވަނަ އަހަރުން ފެށިގެން މިދިޔަ އަހަރުތަކުގެ ތެރޭގައި ސިއްހީ އެކި ކަންކަމުގެ ވެލްފެއާގެ ގޮތުގައި އެންސްޕާއިން ވަނީ ޖުމްލަ 2.06 ބިލިއަން ރުފިޔާ ދޫކޮށްފައެވެ. މީގެ ތެރޭގައި 2024 ވަނަ އަހަރު ބޭސްފަރުވާ ހޯދުމަށް އާސަންދައިގެ އިތުރުން އެހީ ބޭނުންވި ފަރާތްތަކަށް 490.7 މިލިއަން ރުފިޔާ ދޫކޮށްފައިވާއިރު، 2025 ވަނަ އަހަރުގެ ތެރޭގައި 360.4 މިލިއަން ރުފިޔާ ވަނީ ދޫކޮށްފައެވެ.
އެންސްޕާއިން އާއްމުކޮށް އެހީތެރިވަނީ އާސަންދައިން ދޫކުރާ އެހީގެ އިތުރަށް ބަލިމީހުންނަށް ބޭނުންވާ ޚާއްސަ އެހީތެރިކަމަށެވެ. މީގެ ތެރޭގައި ރާއްޖެއިން ބޭރުން ފަރުވާ ހޯދުމަށް ބޭނުންވާ އެހީތެރިކަމާއި، އާސަންދައިގެ ދަށުން ނުލިބޭ ބައެއް ބޭސްތަކާއި ތަކެތި ހިމެނެއެވެ.
ސިއްހީ ފަރުވާގެ ނިޒާމު ހަރުދަނާކޮށް، ރައްޔިތުންނަށް ބޭނުންވާ އަސާސީ އެހީތެރިކަން ފޯރުކޮށްދިނުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން ވަރަށް ބޮޑު އިސްކަމެއް ދެއްވާ ސިޔާސަތެކެވެ. މިގޮތުން ދިވެހި ރައްޔިތުންނަށް ބޭސްފަރުވާގެ ކަންކަމުގައި ދިމާވާ ދަތިތަކަށް ދާއިމީ ހައްލެއް ހޯދައިދިނުމަށްޓަކައި، އެންސްޕާ މެދުވެރިކޮށް ދެމުންގެންދާ އެހީތެރިކަން ހަރުދަނާކުރުމުގެ މަސައްކަތްތައް ސަރުކާރުން ދަނީ ކުރަމުންނެވެ.
