ވަޒީފާއާބެހޭ ޓްރައިބިއުނަލުގެ ރައީސްކަމުގެ މަޤާމަށް އަލްއުސްތާޛު އަމްޖަދު މުޞްޠަފާ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިއަދު ޢައްޔަންކުރައްވައިފިއެވެ.
އެމަނިކުފާނު މިއަދު މަޤާމުގެ ހުވައި ކުރައްވައިފިއެވެ.
ވަޒީފާއާބެހޭ ޓްރައިބިއުނަލުގެ ރައީސްކަމުގެ މަޤާމުގެ ހުވައި، އަލްއުސްތާޛު އަމްޖަދު މުޞްޠަފާ ކުރެއްވީ މިއަދު ހެނދުނު ރައީސުލްޖުމްހޫރިއްޔާގެ އޮފީހުގައި ބޭއްވެވި ޚާއްޞަ ރަސްމިއްޔާތެއްގައެވެ.
މި ރަސްމިއްޔާތުގައި، އޭނާއަށް މަގާމުގެ ހުވައިލައިދެއްވީ ދިވެހިރާއްޖޭގެ ސުޕްރީމް ކޯޓުގެ ފަނޑިޔާރު އޮނަރަބަލް އަލްއުސްތާޛު ޢަބްދުﷲ ޙަމީދެވެ. އަދި އޭނާއަށް މަޤާމުގެ ލިޔުން ހަވާލުކޮށްދެއްވީ ރައީސް މުއިއްޒެވެ.
އަލްއުސްތާޛު އަމްޖަދު މުޞްޠަފާއަކީ ޤާނޫނީ ދާއިރާއިންނާއި ޢާންމު އިދާރީ ހިންގުމުގެ ދާއިރާއިން ފުޅާ ދާއިރާއެއްގައި ތަޖުރިބާ ލިބިވަޑައިގެންފައިވާ ބޭފުޅެކެވެ. އޭނާ ވަނީ ޝަރީޢާއިން ޤާނޫނީ ދާއިރާއިން ބެޗްލަރސް ޑިގްރީ ހާސިލުކުރައްވާފައެވެ.
މީގެ އިތުރުން، ވިޔަފާރި ހިންގުމުގެ ދާއިރާއިން މާސްޓަރ އޮފް ބިޒްނަސް އެޑްމިނިސްޓްރޭޝަން ނުވަތަ އެމް.ބީ.އޭ ވެސް އޭނާ ފުރިހަމަކުރައްވާފައިވެއެވެ.
އަމްޖަދު މުޞްޠަފާއަކީ ވަޒީފާއާބެހޭ ޓްރައިބިއުނަލުގެ މަސައްކަތްތަކަށް އައު ބޭފުޅެއް ނޫނެވެ. މީގެ ކުރިންވެސް އެ ޓްރައިބިއުނަލުގެ ރައީސްކަން ކުރައްވާފައިވާ އަމްޖަދު، އެންމެ ފަހުން އަދާކުރެއްވީ ޗީފް ޖުޑީޝަލް އެޑްމިނިސްޓްރޭޓަރުގެ މަޤާމެވެ. އަދި އިލެކްޝަންސް ކޮމިޝަނުގެ މެންބަރުކަމާއި، މިނިމަމް ވޭޖް އެޑްވައިޒަރީ ބޯޑުގެ މެންބަރުކަން ފަދަ ޒިންމާދާރު މަޤާމުތަކުގައި ވެސް އޭނާ ވަނީ ޚިދުމަތްކުރައްވާފައެވެ.
