ފްރަންޓްލައިން ޑޭ ފާހަގަކުރުމުގެ ގޮތުން ހިންގި ޚާއްސަ ހަރަކާތުގެ ތެރެއިން، މޯލްޑިވްސް ކަރެކްޝަނަލް ސަރވިސްގެ ބެލުމުގެ ދަށުގައި ތިބި ގިނަ އަދަދެއްގެ ގައިދީންނާއި ބަންދުމީހުންނަށް ހުޅުމާލެ ހޮސްޕިޓަލް މެދުވެރިކޮށް މެޑިކަލް ކޮންސަލްޓޭޝަން ނުވަތަ ޑޮކްޓަރަށް ދެއްކުމުގެ ޚިދުމަތް ފޯރުކޮށްދީފިއެވެ.
މި ހަރަކާތުގައި ޖުމްލަ 44 މީހަކަށް ވަނީ ޚާއްސަ ބަލިތަކުގެ ޑޮކްޓަރުންގެ މަޝްވަރާއާއި ފަރުވާ ފޯރުކޮށްދެވިފައެވެ. މީގެ ތެރޭގައި ހިމެނެނީ 38 ފިރިހެން ގައިދީންނާއި 6 އަންހެން ގައިދީންނެވެ.
މި ޚާއްސަ މެޑިކަލް ކޭމްޕްގެ ދަށުން، ހުޅުމާލެ ހޮސްޕިޓަލުގެ އެކި ޑިޕާޓްމަންޓްތަކުގައި މަސައްކަތް ކުރައްވާ ތަފާތު ދާއިރާތަކުގެ ސްޕެޝަލިސްޓް ޑޮކްޓަރުންނަށް ގައިދީން ވަނީ ދައްކާފައެވެ. މީގެ މަގްސަދަކީ ޖަލުތަކުގައި ތިބި ގައިދީންނަށް ބޭނުންވާ ސިއްހީ ފަރުވާ އަވަސްކަމާއެކު ފޯރުކޮށްދީ، އެމީހުންގެ ސިއްހީ ހާލަތު ދެނެގަތުމެވެ.
މިއީ ”ފްރަންޓްލައިން ޑޭ“ އާ ގުޅުވައިގެން، ގައިދީންގެ އިންސާނީ ހައްގުތަކާއި ސިއްހީ ދުޅަހެޔޮކަން ކަށަވަރުކުރުމަށްޓަކައި ހުޅުމާލެ ހޮސްޕިޓަލާއި ކަމާގުޅޭ މުއައްސަސާތައް ގުޅިގެން ހިންގި ކާމިޔާބު ހަރަކާތެކެވެ. މިފަދަ ހަރަކާތްތަކުގެ ސަބަބުން ޖަލުތަކުގައި ތިބޭ މީހުންނަށް ސިއްހީ ފަރުވާ ހޯދުމުގައި ހުރި ދަތިތަކަށް ބޮޑު ލުޔެއް ލިބިގެންދާނެއެވެ.
