މިދިޔަ ޖުލައި މަހުގެ ބަންދާ ދިމާކޮށް ރާއްޖޭގެ އެކި ކުންފުނިތަކުގެ ހަވާލުގައި 4،364 ދިވެހިން ޢުމްރާގެ އަޅުކަން އަދާކުރުމަށް ސައުދީ އަރަބިއްޔާއަށް ދަތުރުކޮށްފައިވާއިރު، އޭގެ ތެރެއިން އެންމެ ގިނަ މީހުން ގެންދިއައީ އަލް-މުޞާފިރް ގްރޫޕުން ކަން އިސްލާމިކް މިނިސްޓަރ ޑރ. މުޙައްމަދު ޝަހީމް ޢަލީ ސަޢީދު ހާމަކުރެއްވި ތަފާސް ހިސާބުތަކުން ދައްކައިފިއެވެ.
މިނިސްޓަރ ޝަހީމް އިސްލާމިކް މިނިސްޓްރީގެ މީޑިއާ ގްރޫޕުގައި ހިއްސާކުރެއްވި ތަފާސްހިސާބުތަކުން ދައްކާގޮތުގައި، ޖުލައި ބަންދުގައި އެންމެ ގިނަ އަދަދަކަށް މީހުން ޢުމްރާއަށް ގެންގޮސްފައިވަނީ މޯލްޑިވްސް ޙައްޖު ކޯޕަރޭޝަނުންނާއި އަލް މުސާފިރް ޕްރައިވެޓް ލިމިޓެޑުންނެވެ.
ޢުމްރާގެ ޚިދުމަތްދޭ ގިނަ އަދަދެއްގެ އަމިއްލަ ކުންފުނިތަކުން މި ދަތުރުތަކުގައި ބައިވެރިވެފައިވާއިރު، ބައެއް މުހިންމު ކުންފުނިތަކުން މީހުން ގެންދިޔަ އަދަދުތަކަކީ:
- އަލް މުސާފިރް ޕްރައިވެޓް ލިމިޓެޑް: 1,004 މީހުން
- މޯލްޑިވްސް ޙައްޖު ކޯޕަރޭޝަން: 640 މީހުން
- ގިބްލަ ޙައްޖު އެންޑް ޢުމްރާ: 330 މީހުން
- މީޤާތު ޙައްޖު އެންޑް ޢުމްރާ: 192 މީހުން
- ޢަރަފާތު ޙައްޖު އެންޑް ޢުމްރާ: 189 މީހުން
- ޘާބިތު ލިލް ޙައްޖު ވަލް ޢުމްރާ: 179 މީހުން
- އަލް ބުރޫޖް ހޯލްޑިންގްސް: 141 މީހުން
- އިމާން ޙައްޖު އެންޑް ޢުމްރާ: 149 މީހުން
- ނިމްސާ މޯލްޑިވްސް: 152 މީހުން
- މިސްކިޔާ ޕްރައިވެޓް ލިމިޓެޑް: 140 މީހުން
- ޙިޖާޒް ޕްރައިވެޓް ލިމިޓެޑް: 138 މީހުން
- މުސާފިރީން (109) މީހުން
މީގެ އިތުރުން ބަޔާން (72)، ތަޒްކިޔާ (68)، އަލް ޞަފާ (70)، ޤާފިލާ (57)، ގުބާ (60)، ޒަޢީ ގްރޫޕް (88)، ރިސާލާ (47) އަދި އަލް މަދީނާ (98) ފަދަ ގިނަ ކުންފުނިތަކަކުން ވަނީ ޢުމްރާވެރިން ގެންގޮސްފައެވެ. މަދު އަދަދެއްގެ މީހުން ގެންދިޔަ ކުންފުނިތަކުގެ ތެރޭގައި ތައުފީޤް އެންޓަރޕްރައިސަސް (16)، އަދި މައްކާ ޓުއާރސް (11) ހިމެނެއެވެ.
ސްކޫލް ބަންދާއި ބޮޑު އީދު ބަންދާ ދިމާކޮށް ކޮންމެ އަހަރަކުވެސް ގިނަ އަދަދެއްގެ ދިވެހިން ޢުމްރާގެ އަޅުކަމަށް ދެއެވެ. ސަރުކާރުގެ އަމާޒަކީ ޢުމްރާގެ ޚިދުމަތް ދޭ ކުންފުނިތަކުން ދޭ ޚިދުމަތްތައް ހަރުދަނާކޮށް، ޢުމްރާވެރިންނަށް ލިބޭ ޚިދުމަތްތަކުގެ ފެންވަރު މަތިކުރުމެވެ. އިސްލާމިކް މިނިސްޓްރީން ދަނީ މިފަދަ ދަތުރުތައް އިންތިޒާމުކުރާ ކުންފުނިތަކުގެ މަސައްކަތްތައް ގާތުން ބަލަމުންނެވެ.
