މި ދުވަސްވަރަކީ ސްކޫލް ބަންދު ދުވަސްވަރަށް ވުމާއެކު، ރާއްޖެއިން އުމްރާގެ އަޅުކަމަށް ސައުދީ އަރަބިއްޔާއަށް ގޮސްތިބި ދިވެހިންގެ އަދަދު 4،000 އަށްވުރެ މަތިވެފައިވާ ކަމަށާއި، އެ އެންމެހާ ދިވެހި އުމްރާވެރިންގެ ހާލުވެސް ރަނގަޅު ކަމަށް އިސްލާމީ ކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް ޢަލީ ސަޢީދު ވިދާޅުވެއްޖެއެވެ.
އިސްލާމީ ކަންތައްތަކާ ބެހޭ ވުޒާރާއިން ހާމަކުރެއްވި ގޮތުގައި، މި ދުވަސްވަރު އެކި ޖަމާޢަތްތަކުގެ ހަވާލުގައި އުމްރާއަށް ގޮސްފައިވާ ދިވެހިންގެ އަދަދު ވަނީ ވަރަށް ބޮޑަށް އިތުރުވެފައެވެ. ޚާއްޞަކޮށް ސްކޫލް ޗުއްޓީއާއި ރަމަޟާން މަހަކީ ދިވެހިން އެންމެ ގިނައިން އުމްރާގެ އަޅުކަމަށްދާ ދުވަސްވަރު ކަމަށްވާއިރު، މި ފަހަރުވެސް ރާއްޖޭގެ އެކި ކަންކޮޅުތަކުން ގިނަ އަދަދެއްގެ ބަޔަކު ވަނީ މި މަތިވެރި އަޅުކަމުގައި ބައިވެރިވެފައެވެ.
ވަޒީރު ޑރ. ޝަހީމް ވިދާޅުވީ، އުމްރާއަށް ގޮސްތިބި ދިވެހިންގެ ކަންކަން އެ ވުޒާރާއިން ގާތުން ބަލަމުންދާ ކަމަށާއި، މިހާތަނަށް ލިބިފައިވާ މަޢުލޫމާތަށް ބަލާއިރު ހުރިހާ އުމްރާވެރިންގެ ހާލުވެސް ރަނގަޅު ކަމަށެވެ.
ފަހަކަށް އައިސް ރާއްޖޭގައި އުމްރާއަށް މީހުން ގެންދާ ގްރޫޕްތައް އިތުރުވަމުންދާތީ، އުމްރާވެރިންގެ ޙައްޤުތައް ހިމާޔަތްކުރުމަށްޓަކައި ހަރުދަނާ އުސޫލުތަކެއް ވަނީ އެކުލަވާލާފައެވެ. އެގޮތުން، އުމްރާއަށް މީހުން ގެންދާ ކުންފުނިތަކުން އުމްރާވެރިންގެ އަތުން ނަގާ ފައިސާ ބޭނުންކުރަންޖެހޭނީ ހަމައެކަނި އުމްރާގެ ދަތުރާ ގުޅުންހުރި ކަންކަމަށް އެކަނި ކަމަށް އުސޫލުގައި ބަޔާންކޮށްފައިވެއެވެ. މި ފައިސާ އެހެން ކަންކަމަށް އިންވެސްޓްކުރުމަކީ މަނާކަމެކެވެ.
އިސްލާމީ ކަންތައްތަކާ ބެހޭ ވުޒާރާއިން އިތުރަށް ބުނީ، އުމްރާއަށް މީހުން ގެންދިއުމުގެ އުސޫލުތަކާ ޚިލާފުވާ ކުންފުނިތަކާމެދު ގަވާއިދުގެ ދަށުން ހަރުކަށި ފިޔަވަޅު އަޅާނެ ކަމަށެވެ. މިއީ އުމްރާވެރިންނަށް އެންމެ ފުރިހަމަ ޚިދުމަތް ދިނުމަށާއި، ދަތުރުގެ ތެރޭގައި ދިމާވެދާނެ ދަތިތަކުން ސަލާމަތްކުރުމަށް އަޅާފައިވާ ފިޔަވަޅެކެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން އަންނަނީ ދިވެހި ޙައްޖުވެރިންނާއި އުމްރާވެރިންނަށް ލިބޭ ޚިދުމަތްތައް ފަހިކޮށްދިނުމަށް ގިނަ މަސައްކަތްތަކެއް ކުރަމުންނެވެ. އޭގެ ނަތީޖާއެއްގެ ގޮތުން ޙައްޖުވެރިންނާއި، ޢުމްރާވެރިން މީގެކުރިން އުފުލަމުންއައި އެތައް ތަކުލީފުތަށް މިހާރުވަނީ ނިމުމަކަށް ގެނެސްފައެވެ.
