އީރާނާއެކު ކުރަމުންދާ ހަނގުރާމަ އިތުރަށް ވަރުގަދަކޮށް، އެމެރިކާގެ ރައީސް ޑޮނަލްޑް ޓްރަމްޕްގެ އަމުރަށް އެމެރިކާ ކަނޑުގެ ސިފައިން އީރާނުގެ ހުރިހާ ތެޔޮ ބަނދަރުތަކެއް އެއްކޮށް ބަންދުކޮށް (ނޭވަލް ބްލޮކޭޑް)، ވަރުގަދަ އޮޕަރޭޝަނެއް ފަށައިފިއެވެ.
އެމެރިކާގެ ސެންޓްރަލް ކޮމާންޑުން (ސެންޓްކޮމް) ބުނިގޮތުގައި، އީރާނުގެ ބަނދަރުތަކަށް ވަންނަން އަދި ނުކުންނަން އުޅުނު ބައިނަލްއަޤްވާމީ 6 ވިޔަފާރި ބޯޓެއް ވަނީ ހިފަހައްޓައި، އެ ބޯޓުތަކުގެ މިސްރާބު ބަދަލުކުރުވާފައެވެ.
އެމެރިކާގެ އަމުރަށް ނުކިޔަމަންތެރިވި 7 ވަނަ ބޯޓަށް (’އެމް.ޓީ ބެލްމާ‘ ތެޔޮ ޓޭންކަރު) އެމެރިކާގެ އަސްކަރީ މަނަވަރަކުން ޙަމަލާދީ، އެ ބޯޓުގެ އިންޖީނު ވަނީ ހަލާކުކޮށްލާފައެވެ.
އެމެރިކާއިން ބުނީ މި ފިޔަވަޅަކީ އީރާނުން ހުރުމުޒު ކަނޑުއޮޅި ބަންދުކޮށްގެން އުޅޭ އުޅުން ނިމުމަކަށް ގެނެސް، އީރާނުގެ ތެޔޮ އެކްސްޕޯޓް އެއްކޮށް ހުއްޓުވުމަށް އެޅި ފިޔަވަޅެއް ކަމަށެވެ.
މި ފިޔަވަޅާއެކު އީރާނުގެ އަސްކަރިއްޔާއިން ވަނީ އެމެރިކާއިން ކުރިއަށްގެންދާ މި ”ޣައިރުޤާނޫނީ“ ހުރަސްއެޅުންތަކަށް ރައްދުގައި، މުޅި ޢަރަބި ކަނޑުގައިވާ ބޭރުގެ ތެޔޮ ބޯޓުތަކަށް ބޮންއަންގާނެ ކަމުގެ އިންޒާރު އަލުން ދީފައެވެ.
