މިދުވަސްވަރަކީ ރާއްޖޭގެ އެކި ހިސާބުތަކުގައި ޑެންގީ ހުން ފެތުރެމުންދާ މިންވަރު އިތުރުވެ، އެ ބަލީގެ ނުރައްކާ ބޮޑުވެފައިވާ ދުވަސްވަރަކަށް ވުމާއެކު، ހުޅުމާލޭގައި މަދިރި އާލާވާ ތަންތަން ނައްތާލުމަށް ޚާއްޞަ ސާފުކުރުމުގެ ހަރަކާތެއް ބޭއްވުމަށް ހުޅުމާލެ ދެކުނު ދާއިރާގެ ޕީއެންސީ ސްޓިއަރިންގ ކޮމިޓީން ނިންމައިފިއެވެ.
މި ހަރަކާތާ ގުޅޭގޮތުން މަޝްވަރާކުރުމަށްޓަކައި ހުޅުމާލެ ދެކުނު ދާއިރާގެ ސްޓިއަރިންގ ކޮމިޓީން މިއަދު ވަނީ ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) ގެ ސީއެސްއާރު ޓީމާ ބައްދަލުކޮށްފައެވެ.
މި ބައްދަލުވުމުގައި، ހުޅުމާލެ ފޭސް 1 ގައި މަދިރި އާލާވުން ހުއްޓުވުމަށް ކުރިއަށްގެންދާ މި ސާފުކުރުމުގެ ހަރަކާތުގައި
އެޗްޑީސީގެ ފުރިހަމަ އެއްބާރުލުމާއި އެހީތެރިކަން ދިނުމަށް ސްޓިއަރިންގ ކޮމިޓީގެ ފަރާތުން ވަނީ އެދިފައެވެ. މީގެ އިތުރުން ވެމްކޯ އާއި އެނޫންވެސް ކަމާއި ގުޅުންހުރި އިދާރާތަކާއި ބައްދަލުކޮށް އެއްބާރުލުމަށް އެދޭނެކަމަށް ކޮމިޓީން ބުނެއެވެ.
ޕީއެންސީ ސްޓިއަރިންގ ކޮމިޓީން މަޢުލޫމާތު ދޭ ގޮތުގައި، މިއީ އެޗްޑީސީން މިހާރުވެސް ކުރިއަށް ގެންދާ ”މަދިރިން ރައްކާ“ ކެމްޕޭނާ ގުޅިގެން، މުޅި ހުޅުމާލެ ފޭސް 1 ހިމެނޭހެން ސާފުކުރުމަށްޓަކައި ރާވާފައިވާ ބޮޑު ހަރަކާތެކެވެ. މި ހަރަކާތުގެ މައިގަނޑު މަޤްޞަދަކީ ހުޅުމާލޭގެ އެކި ސަރަޙައްދުތަކުގައި މަދިރި އާލާވާ ގޮތަށް ހުރި ތަންތަން ބަލައި، އެތަންތަން ސާފުކޮށް، ބަލިމަޑުކަމުން ރައްޔިތުން ރައްކާތެރިކުރުމެވެ.
ސްޓިއަރިންގ ކޮމިޓީން އިތުރަށް ބުނެފައިވަނީ، މި ހަރަކާތް ކުރިއަށް ދާނީ ހުޅުމާލޭގެ އާންމު ރައްޔިތުންގެ ބައިވެރިވުމާއެކު، އެޗްޑީސީގެ އެއްބާރުލުމާ އެކުގައި ކަމަށެވެ.
މި ހަރަކާތް ބޭއްވުމަށް ހަމަޖެހިފައިވާ ރަސްމީ ތާރީޚެއް ކޮމިޓީން އަދި އިޢުލާނެއް ނުކުރެއެވެ. ނަމަވެސް، ވަރަށް އަވަހަށް މި ހަރަކާތް ބާއްވާނެ ތާރީޚާއި ވަގުތު އާންމުކޮށް އިޢުލާނު ކުރާނެ ކަމަށް އެ ކޮމިޓީން މައުލޫމާތުދެއެވެ.
މިދުވަސްވަރު ޑެންގީ ހުން ފަދަ މަދިރީގެ ޒަރީޢާއިން ފެތުރޭ ބަލިތައް އިތުރުވަމުންދާތީ، ރައްކާތެރިކަމުގެ ފިޔަވަޅުތައް އެޅުމަކީ ސަރުކާރާއި ކަމާބެހޭ އިދާރާތަކުން ނުހަނު އިސްކަންދޭ ކަމެކެވެ.
ހުޅުމާލެ ދެކުނު ދާއިރާގެ ޕީއެންސީ ސްޓިއަރިންގ ކޮމިޓީގެ މި އިސްނެގުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން ރައްޔިތުންގެ ސަލާމަތާއި ރައްކާތެރިކަމަށް ކުރަމުންދާ މަސައްކަތްތަކަށް އެއްބާރުލުން ދިނުމުގެ ގޮތުން ކުރިއަށްގެންދާ ހަރަކާތެއް ކަމަށް އެކޮމިޓީން މަޢުލޫމާތު ދެއެވެ.
