އެމެރިކާއާއި އީރާނާ ދެމެދު ކުރަމުންދާ ހަނގުރާމަ އިންތިހާއަށް ނުރައްކާތެރި ފައްތަރަކަށް ބަދަލުވެ، އުރުދުންގައި ހުރި އެމެރިކާގެ އަސްކަރީ ބޭސްތަކަށް އީރާނުން ދިން މިސައިލް އަދި ޑްރޯން ޙަމަލާތަކުގައި އެމެރިކާގެ ދެ ސިފައިން މަރުވެއްޖެ ކަމަށް އެމެރިކާގެ ސެންޓްރަލް ކޮމާންޑުން (ސެންޓުކޮމް) ކަށަވަރުކޮށްދީފިއެވެ.
ސެންޓްކޮމްއިން ހޮނިހިރު ދުވަހު ނެރުނު ރަސްމީ ބަޔާނުގައި ބުނެފައިވަނީ، މި ޙާދިސާ ހިނގާފައިވަނީ ހުކުރު ދުވަހު އީރާނުން މުޅި މެދުއިރުމަތީގައި ހުރި އެމެރިކާގެ އަސްކަރީ މަރުކަޒުތަކަށް އަމާޒުކޮށް ދިން ވަރުގަދަ ރައްދު ޙަމަލާތަކުގެ ތެރެއިންނެވެ.
އީރާނުގެ ބެލިސްޓިކް މިސައިލްތައް އަދި ޖާނުންފިދާވާ ޑްރޯންތައް ސީދާ އަމާޒުވީ އުރުދުންގެ އަޒްރަޤް އެއާ ބޭހަށާއި (މުވައްފަޤް ސަލްޓީ އެއާ ބޭސް) ކިންގް ފައިސަލް އެއާ ބޭހަށެވެ. އުރުދުންގެ އަސްކަރިއްޔާއިން އީރާނުގެ 10 މިސައިލެއް ވައްޓާލި ނަމަވެސް، ބައެއް މިސައިލްތައް ވަނީ ދިފާޢީ ހުރަސްތައް ނައްތާލުމަށްފަހު ސީދާ އެމެރިކާ ސިފައިން ތިބި ބެރެކްތަކަށް އަރައި ގޮވާފައެވެ. މިއީ މި ހަނގުރާމައިގައި އެމެރިކާ ސިފައިން މަރުވި ފުރަތަމަ ފަހަރެވެ.
މި ޙާދިސާއާ ގުޅިގެން އެމެރިކާގެ ދިފާއީ ވުޒާރާއިން (ޕެންޓަގަން) ބުނެފައިވަނީ އީރާނަށް ދެމުންދާ ޙަމަލާތައް އިތުރަށް ވަރުގަދަކުރާނެ ކަމަށެވެ. އެމެރިކާއިން ޖެހިޖެހިގެން 7 ރޭ ވަންދެން އީރާނުގެ ތެޔޮ ޓޭންކަރުތަކަށާއި ފެން ސާފުކުރާ މަރުކަޒުތަކަށް ބޮންއަޅާފައިވާއިރު، މިހާރު ދެޤައުމުގެ މަސްރަޙު އޮތީ މުޅިން ކޮންޓްރޯލުން ނެއްޓިފައެވެ.
