ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) އިން އިންތިޒާމުކޮށްގެން ބޭއްވި 19 އަހަރުން ދަށުގެ ޔޫތު ޗެމްޕިއަންޝިޕް ފުޓުބޯޅަ މުބާރާތުގެ ފޯރިގަދަ ފައިނަލް މެޗަށްފަހު، މާޒިޔާ ސްޕޯޓްސް އެންޑް ރެކްރިއޭޝަނުން މުބާރާތުގެ ޗެމްޕިއަންކަން ހޯދައިފިއެވެ.
ގަލޮޅު ރަސްމީ ފުޓުބޯޅަ ދަނޑުގައި ކުޅުނު މި ފައިނަލް މެޗުގައި މާޒިޔާއިން ޗެމްޕިއަންކަން ކަށަވަރުކުރީ ނިއުރޭޑިއަންޓް ސްޕޯޓްސް ކުލަބާ ވާދަކޮށް 1-4 ގެ ބޮޑު ތަފާތަކުން މެޗު ކާމިޔާބުކޮށްގެންނެވެ.
ދެ ޓީމުގެ ފަރާތުންވެސް ފޯރިގަދަ އަދި ވާދަވެރި ކުޅުމެއް ފެނިގެންދިޔަ މި މެޗުގެ ފުރަތަމަ ހާފުގައި އެއްވެސް ޓީމަކަށް ލަނޑެއް ކާމިޔާބުކުރެވޭ ގޮތެއް ނުވިއެވެ. ފުރަތަމަ ހާފުގައި މާޒިޔާއިން ލަނޑުޖަހާނެ ރަނގަޅު ފުރުސަތުތަކެއް ތަނަވަސްކުރި ނަމަވެސް، ނިއުރޭޑިއަންޓުގެ ކީޕަރު ޒަހުރާން ޙަސަން ޒިޔާދުގެ މޮޅު ސޭވްތަކާއެކު މާޒިޔާގެ ހަމަލާތައް ވަނީ ނާކާމިޔާބުވެފައެވެ.
މެޗުގެ ފޯރި އިތުރަށް ގަދަވެގެންދިޔައީ ދެވަނަ ހާފު ފެށުމާއެކުގައެވެ. މެޗުގެ 55 ވަނަ މިނެޓުގައި ކޯނަރަކުން ލިބުނު ފުރުސަތެއްގައި މާޒިޔާގެ ޑިފެންޑަރު އޭދަން އަޙްމަދު މޫސާ ވަނީ އެ ޓީމަށް ލީޑު ނަގައިދީފައެވެ. އޭގެ ފަހުން 73 ވަނަ މިނެޓުގައި މާޒިޔާގެ ކެޕްޓަން މުޙައްމަދު އިލާން އިމްރާން ވަނީ ހިތްގައިމު ލަނޑެއް ޖަހައި ލީޑު ފުޅާކޮށްދީފައެވެ. މިއީ މުޅި މުބާރާތުގައި އޭނާ ކާމިޔާބުކުރި 14 ވަނަ ލަނޑެވެ.
ނިއުރޭޑިއަންޓުން މެޗުގެ ތެރެއަށް އެނބުރި އައުމަށް ކުރި މަސައްކަތުގެ ތެރެއިން، ލިބުނު ޕެނަލްޓީއެއް ކާމިޔާބުކޮށް އަޙްމަދު ހަމްދާން ވަނީ ފަރަގު ކުޑަކޮށްދީފައެވެ. ނަމަވެސް މެޗުގެ ފަހު މިނެޓުތަކުގައި މާޒިޔާއިން ވަނީ އިތުރު ދެ ލަނޑު ޖަހައި ނިއުގެ އުންމީދުތައް ފުނޑުފުނޑުކޮށްލާފައެވެ. އެގޮތުން 90 ވަނަ މިނެޓުގައި ނައްސާޙް އިބްރާޙީމް ނާސިރު ލަނޑެއް ޖެހިއިރު، މެޗުގެ ފަހު ލަނޑު އިތުރު ވަގުތުގެ ތެރޭގައި ކާމިޔާބުކޮށްދިނީ އަލްޙާން ފައިސަލެވެ.
ފައިނަލް މެޗުގެ މޮޅު ކުޅުންތެރިއަކަށް ހޮވުނީ މާޒިޔާގެ ނައްސާޙް އިބްރާޙީމް ނާސިރެވެ. މުބާރާތުގެ ރަނަރަޕްކަން ނިއުރޭޑިއަންޓް ހޯދިއިރު، ފެއާ ޕްލޭ ޓީމަކަށް ހޮވުނީ ކެޔޮދޫ ރެކްރިއޭޝަން ކުލަބެވެ. މި މުބާރާތުގައި މާޒިޔާ އާއި ނިއުގެ އިތުރުން އޮޑި ސްޕޯޓްސް ކުލަބާއި، ބުރު ސްޕޯޓްސް ކުލަބު އަދި ޓީސީ ސްޕޯޓްސް ކުލަބުން ވާދަކުރިއެވެ.
