ރާއްޖެއަށް ބޭނުންވާ ބޭސްތައް ދުރާލާ ދެނެގަނެވޭނެ ހަރުދަނާ ނިޒާމެއް ޤާއިމުކުރުމުގެ މަސައްކަތް ސްޓޭޓް ފާމަސޫޓިކަލްސް އެންޑް މެޑިކަލް ސަޕްލައި ކޯޕަރޭޝަނުން ފަށައިފިއެވެ.
ޕީއެސްއެމް ނިއުސްގެ ”ރާއްޖެ މިއަދު“ ޕްރޮގްރާމުގައި ވާހަކަދައްކަވަމުން އެ ކުންފުނީގެ މެނޭޖިންގ ޑިރެކްޓަރ ޑރ. ޝާހު މާހިރު ވިދާޅުވީ، ރާއްޖޭގައި ބޭސް ލިބުމުގައި ހުރި ގޮންޖެހުންތަކަށް ދާއިމީ ހައްލެއް ލިބޭނީ ބޭނުންވާ ބޭހުގެ މައުލޫމާތު ކުރިއާލާ އެނގިގެން ކަމަށެވެ. މިކަން ހައްލުކުރުމަށްޓަކައި އެންޓަޕްރައިސް ރިސޯސް މެނޭޖްމަންޓް (އީއާރުޕީ) ސިސްޓަމަކާއި އީ-ލޮޖިސްޓިކްސް ސިސްޓަމެއް ޤާއިމުކުރުމުގެ ފުރަތަމަ ފިޔަވަހީގެ މަސައްކަތް މިހާރު ވަނީ ނިމިފައެވެ.
މި އައު ނިޒާމުގެ ސަބަބުން ރާއްޖޭގައި މިވަގުތު ބޭހުގެ ސްޓޮކް ހުރި މިންވަރާއި، ކުރިއަށް އޮތް އަހަރު ބޭނުންވާނެ ބޭހުގެ ބާވަތްތަކާއި އަދަދު ދުރާލާ ދެނެގަނެވޭނެއެވެ. ޑރ. ޝާހު ވިދާޅުވީ، މި ސިސްޓަމްގެ ސަބަބުން ކޮންމެ ރަށެއްގައިވެސް ބަލިމީހުން ތިބި އަދަދަށް ބަލައި، އެ ރަށަކަށް ބޭނުންވާ ބޭސް މެދުނުކެނޑި ފޯރުކޮށްދިނުމުގެ ގާބިލްކަން ލިބިގެންދާނެ ކަމަށެވެ.
”ކުދި އާބާދީގައި ޚާއްސަކޮށް ކުދިކުދި ރަށްރަށުގައި މިސާލަކަށް ދަންނަވަންޏާ ހަކުރުބަލީގެ ކިތަށް މީހުންތޯ އެ ރަށުގައި ދިރިއުޅެނީ. އެނގިއްޖެ ކަމަށްވަންޏާ މެދުނުކެނޑި އަޅުގަނޑުމެންނަށް ސްޓޮކް ކުރެވޭނެ އެރަށުގައި. އެނބަ އިނގޭ އެ ބޭސްތައް ބޭނުން ކުރާނެކަން،“ ޑރ. ޝާހު ވިދާޅުވިއެވެ.
މީގެ އިތުރުން، މި ނިޒާމުގެ ތެރެއިން އާންމުންނަށް ޚާއްސަ ޕޯޓަލެއް ތައާރަފުކުރެވޭނެއެވެ. މީގެ ސަބަބުން ރާއްޖޭގައި ބޭސް ހުރި ތަންތަނާއި ބޭސް ލިބެން ހުރި މިންވަރު ކޮންމެ ރައްޔިތަކަށްވެސް ވަގުތުން ބަލައިލެވޭނެއެވެ.
ޑރ. ޝާހު އިތުރަށް ފާހަގަކުރެއްވި ގޮތުގައި، މި ނިޒާމުގެ މަސައްކަތް އަންނަ ސެޕްޓެމްބަރު މަހަށް މުޅިން ނިންމާލެވޭނެއެވެ. އަދި މިވަގުތު ރާއްޖެއަށް ދަތިވެފައިވާ ބޭސްތައް ގެނައުމުގެ މަސައްކަތް ބާރުދުވެލީގައި ކުރިއަށްދާ ކަމަށާއި، ކުރިއަށް އޮތް ދެ ހަފުތާއެއްހާ ދުވަހުގެ ތެރޭގައި ގިނަ ބޭސްތަކެއް ރާއްޖެއަށް ލިބިގެންދާނެ ކަމަށްވެސް އޭނާ ވިދާޅުވިއެވެ.
މި މަސައްކަތުގެ މައިގަނޑު މަގުސަދަކީ ރާއްޖޭގެ ކޮންމެ ސަރަހައްދެއްގައި ހުރި ރައްޔިތަކަށްވެސް ފެންވަރު ރަނގަޅު ބޭސް ހުސްނުވެ ލިބޭނެކަން ކަށަވަރުކުރުންކަމަށް ސަރުކާރުން ބުނެއެވެ.
