މާލޭ ސަރަހައްދުގެ ޕާކިންގ މައްސަލައަށް ދާއިމީ ހައްލެއް ހޯއްދަވައިދެއްވުމުގެ ގޮތުން، މި އަހަރުގެ ތެރޭގައި ދެ ޕާކިންގ ބިލްޑިންގ އިމާރާތް ކުރުމުގެ އަމަލީ މަސައްކަތް ފަށްޓަވާނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ރައީސުލްޖުމްހޫރިއްޔާގެ އޮފީހުން ބޭއްވި ”ދަ ޕަލްސް“ ޕޮޑްކާސްޓްގެ ހަތަރު ވަނަ އެޕިސޯޑުގައި ދެއްވި އިންޓަރވިއުއެއްގައި ރައީސް ވިދާޅުވީ، މާލޭގެ ތޮއްޖެހުމާއި އުޅަނދުތައް އިތުރުވުމުގެ މައްސަލައަކީ ވަގުތީ ހައްލެއް ގެނެސްގެން ނިންމާލެވޭނެ ކަމެއް ނޫން ކަމަށެވެ. މި މައްސަލައަށް އޮތް ހައްލެއްގެ ގޮތުން ބޮޑުތަކުރުފާނު މަގު ޒަމާނީ ފެންވަރަށް ތަރައްގީކުރުމުގެ މަސައްކަތް މިހާރު ނިމުމަކާ ގާތްވެފައިވާ ކަމަށާއި، ކުރިއަށް އޮތް ހަފުތާގެ ތެރޭގައި އެ މަގު އާންމުންނަށް ހުޅުވާލުމުން މާލޭގެ އެތެރޭގެ މަގުތަކުގެ ޓްރެފިކަށް ބޮޑު ލުޔެއް ލިބިގެންދާނެ ކަމަށް އެމަނިކުފާނު ވިދާޅުވިއެވެ.
ޕާކިންގ ބިލްޑިންގތަކާ ގުޅޭގޮތުން ރައީސް ވިދާޅުވީ، އެންމެ ފުރަތަމަ މި މަސައްކަތް ބޭރުގެ އެހީގައި ކުރިއަށްގެންދަން ނިންމުމުގެ ސަބަބުން ކޮންމެވެސް ވަރެއްގެ ލަސްތަކެއް ކުރިމަތިވި ކަމަށާއި ނަމަވެސް، ސަރުކާރުން މިހާރު ނިންމާފައިވަނީ ދައުލަތުގެ ބަޖެޓުން ހަރަދުކޮށްގެން މި އަހަރުގެ ތެރޭގައި ދެ އިމާރާތެއްގެ މަސައްކަތް ފެށުމަށް ކަމަށެވެ.
މީގެ އިތުރުން، މިހާރުވެސް ދެ ޕާކިންގ ބިލްޑިންގއެއްގެ މަސައްކަތް އެކި މަރުހަލާތަކުގައި ކުރިއަށްދާކަން ފާހަގަކުރައްވަމުން ރައީސް ވިދާޅުވީ، މި މަޝްރޫއުތައް ނިމުމުން އުޅަނދުތައް ޕާކުކުރުމުގައި ދިމާވާ ދަތިތަކަށް ބޮޑު ހައްލެއް ލިބޭނެ ކަމަށެވެ. އަދި ބޮޑުތަކުރުފާނު މަގު ތަރައްގީކުރުމުގެ ތެރެއިން ޕާކިންގއަށް ހާއްސަ ޖާގަތަކެއް ކަނޑައެޅިފައިވާތީ، މުސްތަގުބަލުގައި މި މައްސަލައަށް އިތުރު ލުއިފަސޭހަކަމެއް ލިބިގެންދާނެކަމުގެ ޔަގީންކަން އެމަނިކުފާނު ދެއްވިއެވެ.
