މެދުއިރުމަތީގެ ކަނޑުގެ ސަރަހައްދުގައި ކުރަމުންދާ ހަނގުރާމަ ވަރަށް ބޮޑަށް ހޫނުވެ، އެމެރިކާގެ ސެންޓްރަލް ކޮމާންޑް (ސެންޓްކޮމް) އިން ޖެހިޖެހިގެން 7 ވަނަ ރެއަށް އީރާނަށް ވަރުގަދަ ވައިގެ ޙަމަލާތަކެއް ދީފިއެވެ. މިފަހަރުގެ ޙަމަލާތައް ސީދާ އަމާޒުކޮށްފައިވަނީ އީރާނުގެ މުހިންމު އިޤްތިޞާދީ އަދި ދަތުރުފަތުރުގެ ވަޞީލަތްތަކަށެވެ.
ޚާރްގް ޖަޒީރާގެ ތެޔޮ ޓޭންކަރު
މި ފިޔަވަހީގައި ދިން އެންމެ ބޮޑު ހަމަލާ އަމާޒުވީ އީރާނުގެ ތެޔޮ ބޭރުކުރާ މައި މަރުކަޒު ކަމަށްވާ ޚާރްގް ޖަޒީރާއަށެވެ. އެތަނުގެ ބަނދަރުގައި އޮތް އީރާނުގެ ތެޔޮ ޓޭންކަރަކަށް އެމެރިކާއިން ބޮންއަޅައި، ބޯޓު ދަތުރުނުކުރެވޭ ވަރަށް ވަނީ ހަލާކުކޮށްލާފައެވެ.
އާންމުންނާއި މަދަނީ އުމްރާނީ ވަޞީލަތްތަކަށް ޙަމަލާދިނުން
އީރާނުގެ ޚާރިޖީ ވަޒީރު ޢައްބާސް އަރާޤްޗީ ކަށަވަރުކޮށްދިން ގޮތުގައި، ރޭ އެމެރިކާއިން ދިން ހަމަލާތަކުގައި އީރާނުގެ އެކި ސަރަހައްދުތަކުން 8 މީހުން ވަނީ މަރުވެފައެވެ. މީގެ ތެރޭގައި ބަންދަރު ޚަމީރުގެ ބޮޑު ހައިވޭ ބްރިޖަކަށް ދިން ހަމަލާގައި މަރުވި 3 މީހުން ހިމެނެއެވެ.
އެމެރިކާގެ ދަޢުވާ އަދި އީރާނުގެ ރައްދު
އެމެރިކާއިން ބުނަމުންދަނީ މި ޙަމަލާތަކަކީ އީރާނުން ވިޔާފާރި ބޯޓުތަކަށްދޭ ނުރައްކާ ކުޑަކުރުމަށް ދޭ ހަމަލާތަކެއް ކަމަށެވެ. ނަމަވެސް އީރާނުގެ އަސްކަރިއްޔާއިން ވަނީ މިއީ އާންމު ރައްޔިތުންގެ ވަޞީލަތްތަކަށް ދޭ ހަމަލާތަކެއް ކަމަށް ބުނެ، މީގެ ބަދަލު ވަރަށް ހޫނުކޮށް ހިފާނެ ކަމުގެ އިންޒާރު އަލުން ދީފައެވެ.
