މާލޭގެ މަގުތައް ހަދަން އަންނަ އަހަރުގެ ކުރީކޮޅު ފަށާނެ ކަމަށް، ރައީސް ޑރ. މުހައްމަދު މުއިއްޒު މިއަދު ވިދާޅުވެއްޖެ އެވެ.

Ads by

ރައީސް އޮފީހުން ކުރިއަށްގެންދާ ދަ ޕަލްސް ޕޮޑްކާސްޓުގައި ވާހަކަފުޅު ދައްކަވަމުން ރައީސް ވިދާޅުވީ، ޗައިނާ ސަރުކާރުގެ ހިލޭ އެހީގައި ކުރިއަށްގެންދާ މި މަޝްރޫއުގެ ދަށުން މާލޭގެ މަގުތައް އެއްކޮށް ތަރައްގީކޮށް ޒަމާނީ ބަދަލުތަކެއް ގެންނާނެ ކަމަށެވެ.

މީގެ ކުރިން ކުރީގެ ރައީސް މައުމޫން އަބްދުލްގައްޔޫމުގެ ވެރިކަމުގައި މަގުތައް ހެދުމުގެ ބޮޑު މަޝްރޫއެއް ހިންގި ނަމަވެސް، އޭގެ ފަހުން މަގުތައް ބެލެހެއްޓުމުގައި އިހުމާލުތަކެއް ވެފައިވާކަން އެ މަނިކުފާނު ފާހަގަކުރެއްވި އެވެ.

މި މަޝްރޫއަކީ މާލޭގެ ރައްޔިތުންނަށް ވެވަޑައިގެންނެވި މުހިންމު ވައުދެއްކަން ފާހަގަކުރައްވައި ރައީސް ވިދާޅުވީ، މަސައްކަތް ފެށިގެން ދެން ނިމޭނީ ހުރިހާ މަސައްކަތެއް ފުރިހަމައަށް ނިންމައިގެން ކަމަށެވެ. މީގެ އިތުރުން ޗައިނާގެ އެހީގައި ވިލިމާލޭގެ މަގުތައް ޒަމާނީ ފެންވަރަށް ތަރައްގީކުރުމުގެ މަސައްކަތްވެސް މި މަޝްރޫއުގެ ތެރޭގައި ހިމެނޭކަމަށް އެ މަނިކުފާނު ވިދާޅުވި އެވެ.

މި މަޝްރޫއުގެ ދަށުން މަގުތައް ތަރައްގީކުރާއިރު، ފެން ބޮޑުވުމުގެ މައްސަލައަށް ދާއިމީ ހައްލެއް ހޯދުމަށް ސްޓޯމްވޯޓާ ޑްރައިނޭޖް ނިޒާމެއް ގާއިމުކުރެވޭނެ އެވެ. އަދި އިމާރާތްކުރުމަށް ބޭނުންކުރާ ޑީވޯޓަރިން ނިޒާމާއި، އަލިފާން ނިއްވުމަށް ބޭނުންކުރާ ފަޔާ ހައިޑްރަންޓް ނިޒާމު ވެސް މަގުތަކުގައި ބަހައްޓާނެ އެވެ.

މި ބަދަލުތަކާއެކު، މަގުތަކަކީ ހަމައެކަނި ދަތުރުފަތުރަށް ފަސޭހަ ތަންތަނަކަށް ހެދުމުގެ އިތުރުން، ރައްޔިތުންނަށް ހިތްފަސޭހަ މާހައުލެއް ލިބިގެންދާނެ ކަމަށް ރައީސް ވިދާޅުވި އެވެ.

މި ސަރުކާރުން ބޭރު މަގު ހެދުމުގެ ފުރަތަމަ ފިޔަވަހި ނިންމާފައިވާއިރު، ދެ ވަނަ ފިޔަވަހީގެ މަސައްކަތްތައް ވެސް މިހާރު ވަނީ ފަށައިފަ އެވެ. އެގޮތުން އިއްޒުއްދީން ފާލަމުން ފެށިގެން ބާސެލޯ ނަސަންދުރާއާ ހަމައަށް އޮންނަ ސަރަހައްދުގެ މަސައްކަތް ނިންމައި އަންނަ ހަފުތާގައި ހުޅުވުމަށް ވަނީ ހަމަޖެހިފަ އެވެ. އެ ސަރަހައްދުގައި 500 ސައިކަލު ޕާކުކުރެވޭނެ ޖާގައެއް ކަނޑައަޅާނެ ކަމަށްވެސް ރައީސް ވިދާޅުވި އެވެ.

އެއަށްފަހު، އެމްޕީއެލް އިން ފެށިގެން ރަސްފަންނާ ހަމައަށް ބޮޑުތަކުރުފާނު މަގު ހެދުމުގެ ތިން ވަނަ ފިޔަވަހި ފެށުމަށް ވަނީ ރާވައިފަ އެވެ.

ރައީސް ވިދާޅުވި ގޮތުގައި، މާލޭގެ ތޮއްޖެހުމުގެ މައްސަލައަށް ދާއިމީ ހައްލެއް ލިބޭނީ ހިދުމަތްތަކާއި ފުރުސަތުތައް އަދި ބޯހިޔާވަހިކަން ލާމަރުކަޒުކޮށް ސަރަހައްދީ ތަރައްގީ ގެނެސްގެންނެވެ. ރާއްޖޭގެ އާބާދީގެ 40 ޕަސެންޓު މީހުން ދިރިއުޅޭ މާލޭ ސަރަހައްދަށް ބޭނުންވާ މިފަދަ ހައްލުތައް ފޯރުކޮށްދިނުމަކީ ސަރުކާރުގެ އިސްކަމެއް ކަމަށް އެ މަނިކުފާނު ފާހަގަކުރެއްވި އެވެ.