ބޮޑުތަކުރުފާނު މަގު ފުޅާކޮށް ޒަމާނީ ފެންވަރަށް ތަރައްގީކުރުމުގެ މަޝްރޫއަކީ މާލޭގެ ޓްރެފިކް ތޮއްޖެހުމަށް ދާއިމީ ހައްލެއް ހޯދައިދިނުމަށް ސަރުކާރުން ކުރިއަށްގެންދާ މުހިންމު މަސައްކަތެއް ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.
ރައީސް އޮފީހުން ގެނެސްދޭ ”ދަ ޕަލްސް“ ޕޮޑްކާސްޓުގެ ހަތަރު ވަނަ އެޕިސޯޑުގައި ދެއްވި އިންޓަވިއުއެއްގައި ރައީސް ވިދާޅުވީ، ބޭރުމަގު ފުޅާކުރުމުގެ މަސައްކަތަކީ ރައްޔިތުންނަށް ދަތުރުފަތުރުގެ ފަސޭހަކަން ހޯދައިދިނުމަށް ސަރުކާރުން އިސްކަމެއް ދީގެން ކުރިއަށްގެންދާ މަސައްކަތެއް ކަމަށެވެ.
މި މަސައްކަތުގެ ބޮޑު ބައެއް މިހާރު ނިމިފައިވާއިރު، ކުރިއަށް އޮތް ހަފުތާއެއްގެ ތެރޭގައި އިއްޒުއްދީން ފާލަމާ ހަމައަށް މަގު ހުޅުވާލުމަށް މަސައްކަތް ކުރަމުން އަންނަ ކަމަށް އެ މަނިކުފާނު ވިދާޅުވިއެވެ. މި މަޝްރޫއުގެ ސަބަބުން އިއްޒުއްދީން ފާލަމުން ފެށިގެން އައިޖީއެމްއެޗާ ހަމައަށް ދަތުރުކުރާ ފަރާތްތަކަށް ބޮޑު ފަސޭހައެއް ލިބިގެންދާނެ ކަމަށް ވިދާޅުވިއެވެ.
މަގު ފުޅާކުރުމުގެ މަސައްކަތާއެކު ޕާކިންގެ މައްސަލައަށް ހައްލު ހޯދުމަށްވެސް ސަރުކާރުން މަސައްކަތް ކުރައްވަމުން އަންނަ ކަމަށް ރައީސް ވިދާޅުވިއެވެ. އެގޮތުން މަގުގެ އަރިމަތީގައި ޕާކުކުރުމުގެ ބަދަލުގައި، އަލަށް ހިއްކި ސަރަހައްދުގައި 500 އެއްހާ އުޅަނދު ޕާކުކުރެވޭނެ އިންތިޒާމު ހަމަޖެހިގެންދާނެ ކަމަށް އެ މަނިކުފާނު ވިދާޅުވިއެވެ.
މި މަސައްކަތް ނިމުމުން އިއްޒުއްދީން ފާލަމުން ފެށިގެން އައިޖީއެމްއެޗާ ހަމަޔަށް ދަތުރުކުރާ ފަރާތްތަކަށް ބޮޑު ފަސޭހައެއް ލިބޭނެ. އަދި މަގުގެ އަރިމަތީގައި ޕާކުކުރުމުގެ ބަދަލުގައި، އަލަށް ހިއްކި ސަރަހައްދުގައި 500 އެއްހާ އުޅަނދު ޕާކުކުރެވޭނެ އިންތިޒާމު ހަމަޖެހިގެންދާނެ – ރައީސް ވިދާޅުވިއެވެ.
މީގެ އިތުރުން އަލަށް ތަރައްގީކުރާ ސަރަހައްދުގައި ކީ-ވޯލް ހަރުކުރުމުގެ ސަބަބުން ލޯންޗް ފަހަރަށް ފަސޭހަކަމާއެކު ކައިރިކުރެވޭނެ ޖާގަ ލިބި، މުދާ އެރުވުމާއި ބޭލުމުގެ މަސައްކަތްތައް ހަލުވިވެގެންދާނެ ކަމަށާއި ދަތުރުވެރިންނަށް ބޭނުންވާ ބެންޗުތަކާއި ހިޔާ ލިބޭނެ އިންތިޒާމުތައްވެސް މި މަޝްރޫއުގެ ތެރޭގައި ހިމެނޭ ކަމަށް ރައީސް ވިދާޅުވިއެވެ.
މާލޭގެ މަގުތައް ހިތްފަސޭހަ ތަނަކަށް ހެދުމަށްޓަކައި ގަސް އިންދުމުގެ މަސައްކަތް ކުރިއަށްގެންދާނެ ކަމަށްވެސް ރައީސް ވިދާޅުވިއެވެ.
ރައީސް ވިދާޅުވީ މޯލްޑިވްސް ޕޯޓްސް ލިމިޓެޑް ސަރަހައްދުން ފެށިގެން ވެސްޓް ޕާކާ ހަމައަށް އޮތް މަގުތައް ހެދުމުން މާލޭގެ ވިޔަފާރި ސަރަހައްދަށް ދިމާވެފައިވާ ޓްރެފިކްގެ މައްސަލައަށް ދާއިމީ ހައްލެއް ލިބޭނެ ކަމަށެވެ.. ސަރުކާރުގެ އަމާޒަކީ ހަމައެކަނި މަގުތައް ފުޅާކުރުން ނޫން ކަމަށާއި މާލެއަށް އެތެރެކުރާ އުޅަނދުފަހަރު ކޮންޓްރޯލްކޮށް، ދިގު މުއްދަތުގެ ޕްލޭނެއްގެ ދަށުން މާލޭގެ ތޮއްޖެހުން ކުޑަކުރުން ކަމަށްވެސް އެ މަނިކުފާނު ފާހަގަކުރެއްވިއެވެ.
