އެމެރިކާ އާއި އީރާނާ ދެމެދު ކުރަމުންދާ ހަނގުރާމަ ވަރުގަދަވެ، މެދުއިރުމަތީގެ އެންމެ މުހިންމު ދެ ކަނޑުއޮޅި ކަމަށްވާ ހޮރްމޫޒް އަދި ރެޑް ސީ (ބާބުލް މަންދަބު) އެއްކޮށް ބަންދުވެދާނެ ކަމުގެ ބިރު ބޮޑުވުމުން، ދުނިޔޭގެ ބާޒާރުގައި ތެލުގެ އަގު މިހަފްތާގައި 12 އިންސައްތައަށް އުފުލިއްޖެއެވެ.
އަގުތަކަށް އައި ބަދަލު
– ބްރެންޓް ކުރޫޑް: ބައިނަލްއަޤްވާމީ ބާޒާރުގައި ބްރެންޓް ތެލުގެ އަގު 1.05 ޑޮލަރު އުފުލި، ފީފާއަކަށް 85.28 ޑޮލަރަށް ވަނީ އަރާފައެވެ.
– ޑަބްލިއު.ޓީ.އައި: އެމެރިކާގެ ވެސްޓް ޓެކްސަސް އިންޓަރމީޑިއަޓްގެ އަގު 1.03 ޑޮލަރު މަތިވެ، ފީފާއަކަށް 79.98 ޑޮލަރަށް ވަނީ ޖެހިލާފައެވެ.
ދެ ކަނޑުއޮޅީގެ ނުރައްކާ
ތެލުގެ އަގު މިހާ ބޮޑަށް އުފުލެން ދިމާވީ، އެމެރިކާއިން އީރާނުގެ އެތެރޭގެ ކަރަންޓު އުފައްދާ މަރުކަޒުތަކަށް ޙަމަލާދީފިނަމެ، ރެޑް ސީ އަށް ވަދެވެން އޮންނަ ’ބާބުލް މަންދަބު‘ ކަނޑުއޮޅި އެއްކޮށް ބަންދުކުރުމަށް ޔަމަނުގެ ހޫޘީންނަށް އީރާނުން އަންގާފައިވާކަމުގެ ޚަބަރު ލިބުމާ ގުޅިގެންނެވެ. ހޮރްމޫޒް ކަނޑުއޮޅި މިހާރުވެސް ބަންދުވެފައި އޮތްއިރު، ބާބުލް މަންދަބު ވެސް ބަންދުވެއްޖެނަމަ ދުވާލަކު 20 މިލިއަން ފީފާގެ ތެޔޮ ސަޕްލައި ހުއްޓޭނެއެވެ. މިއީ ދުނިޔޭގެ ވިޔަފާރިއަށް ކުރިމަތިވާނެ އެންމެ ބޮޑު ކާރިސާއެވެ.
އެމެރިކާގެ ސެންޓްރަލް ކޮމާންޑުން ޖެހިޖެހިގެން 6 ވަނަ ރެއަށް އީރާނަށް ވައިގެ ޙަމަލާތައް ދެމުންދާއިރު، ބައިނަލްއަޤްވާމީ ހަކަތައާ ބެހޭ އިދާރާ (އައިއީއޭ) ގެ ވެރިޔާ ފާތިހް ބިރޯލް ބުނީ، ކުރިއަށް އޮތް ހަފްތާތަކުގައި މަސްރަޙު ފިނިނުވެއްޖެނަމަ ދުނިޔޭގެ ހަކަތައިގެ ރައްކާތެރިކަން މުޅިން ގެއްލިގެން ހިނގައިދާނެ ކަމަށެވެ.
