ހުރުމްޒް ކަނޑުއޮޅީގެ ކޮންޓްރޯލް ހޯދުމަށް ކުރަމުންދާ ހަނގުރާމައިގެ ތެރެއިން، އެމެރިކާގެ އަސްކަރިއްޔާއިން އީރާނަށް އަމާޒުކޮށް 5 ވަނަ ފިޔަވަހީގެ ވައިގެ ޙަމަލާތަކެއް ދޭން ފަށައިފިއެވެ.
އެމެރިކާގެ ސެންޓްރަލް ކޮމާންޑް (ސެންޓްކޮމް) އިން ސޯޝަލް މީޑިއާގައި އާންމުކުރި ބަޔާނެއްގައި ބުނެފައިވަނީ، ބުރާސްފަތި ދުވަހު ފެށި މި އާ ޙަމަލާތަކުގެ މައިގަނޑު މަޤްޞަދަކީ އީރާނުގެ އަސްކަރީ ޤާބިލުކަން އިތުރަށް ބަލިކަށިކޮށް، އައްސޭރިފަށުގެ ދިފާޢީ ނިޒާމުތައް ނައްތާލުން ކަމަށެވެ.
ޖޫން މަހު ޤާއިމުކުރި ވަގުތީ ސުލްޙަ އެއްކޮށް ރޫޅިފައިވާއިރު، އެމެރިކާއިން ދަނީ އީރާނުގެ ބަނދަރުތައް އަސްކަރީ ގޮތުން ބަންދުކޮށްފައެވެ. ރައްދުގައި އީރާނުން ދަނީ މެދުއިރުމަތީގައި ހުރި އެމެރިކާގެ އަސްކަރީ މަރުކަޒުތަކަށް ޙަމަލާދެމުންނެވެ. މި ޙަމަލާތަކުގެ ސަބަބުން މުޅި މެދުއިރުމަތި ފުރިހަމަ ހަނގުރާމައަކަށް ވެއްޓުމުގެ ބިރު ވަނީ އިންތިހާއަށް ބޮޑުވެފައެވެ.
