ދިވެހި ސިފައިންގެ ހިދުމަތާ އަލަށް ގުޅުނު 72 ވަނަ އަދި 73 ވަނަ އަސާސީ ތަމްރީނު ކޯހުގެ ދަރިވަރުން، އެމީހުންގެ ތަމްރީނުތައް ކާމިޔާބުކަމާއެކު ފުރިހަމަކޮށް، މިއަދު ހުވާކޮށްފިއެވެ.
ކ. ގިރިފުށީ ޓްރޭނިންގ ސެންޓަރުގެ ހެވިކަމުގެ މައިދާނުގައި މިއަދު ބޭއްވި މި ރަސްމިއްޔާތު ޝަރަފުވެރިކޮށްދެއްވީ ރައީސުލްޖުމްހޫރިއްޔާ އަދި ސިފައިންގެ އެންމެ މަތީ ވެރިޔާ ޑރ. މުޙައްމަދު މުޢިއްޒެވެ. މި ރަސްމިއްޔާތުގައި ޑިފެންސް މިނިސްޓަރު ޙަސަން ރަޝީދާއި، ޗީފް އޮފް ޑިފެންސް ފޯސް މޭޖަރ ޖެނެރަލް އިބްރާހިމް ހިލްމީގެ އިތުރުން ސިފައިންގެ އިސް އޮފިސަރުން ބައިވެރިވެވަޑައިގެންނެވިއެވެ.
މި ފަހަރުގެ 2 ބެޗުން ޖުމްލަ 255 ދަރިވަރުން ވަނީ ސިފައިންގެ ހުވާކޮށްފައެވެ. އޭގެ ތެރޭގައި ހިމެނެނީ 72 ވަނަ އަސާސީ ތަމްރީނު ކޯހުގެ 138 ދަރިވަރުންނާއި، 73 ވަނަ އަސާސީ ތަމްރީނު ކޯހުގެ 117 ދަރިވަރުންނެވެ. ދަރިވަރުންނަށް ހުވާލައިދެއްވީ ހައިކޯޓުގެ ފަނޑިޔާރު އަލްއުސްތާޛް ޙުސައިން މަޒީދެވެ.
ރަސްމިއްޔާތުގެ އެންމެ ފާހަގަކޮށްލެވޭ އެއް ކަމަކީ، ތަމްރީނު ނިންމި ދަރިވަރުންނަށް ބަޑި ހަވާލުކޮށްދެއްވުމެވެ. ތަމްރީނު ނިންމި ދަރިވަރުންނަށް ބަޑި ހަވާލުކޮށްދެއްވީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒެވެ.
އެމްއެންޑީއެފް ކޮލެޖް އޮފް ޑިފެންސް އެންޑް ސެކިއުރިޓީ ސްޓަޑީޒްއިން ކުރިއަށްގެންދިޔަ މި ކޯހަކީ 7 މާރިޗު 2024 ވަނަ ދުވަހުން ފެށިގެން 4 މަސްދުވަހުގެ މުއްދަތަށް ކުރިއަށްގެންދިޔަ ކޯހެކެވެ. މީގެ ތެރެއިން 72 ވަނަ ބެޗުގެ ތަމްރީނުތައް އައްޑޫ ސިޓީގައި ހުންނަ އެމްއެންޑީއެފް ސަދަން އޭރިއާ ކޮމާންޑް ޓްރޭނިންގ ސެންޓަރުގައި ކުރިއަށްގެންދިޔައިރު، 73 ވަނަ ބެޗުގެ ތަމްރީނުތައް ކުރިއަށްގެންގޮސްފައިވަނީ ކ. ގިރިފުށީގައެވެ.
ސިފައިންގެ އަސާސީ ތަމްރީނު ކޯހަކީ އަލަށް ސިފައިންގެ ހިދުމަތާ ގުޅޭ ފަރާތްތަކަށް، ސިފައިންގެ އެކި ދާއިރާތަކުގައި މަސައްކަތްކުރެވޭ ފެންވަރަށް ބޭނުންވާ އިލްމާއި ހުނަރު އުނގަންނައިދިނުމަށް ހިންގޭ ކޯހެކެވެ. މި ކޯހުގެ މައިގަނޑު މަގްސަދަކީ ދިވެހި ގައުމިއްޔަތަށް ލޯބިކުރާ، އަހްލާގީ ގޮތުން ނަމޫނާ، އަމުރަށް ކިޔަމަންތެރިވާ އަދި ހަށިހެޔޮ ސިފަވަންތަ ސިފައިންގެ ބަޔަކު ބިނާކުރުމެވެ.
މިއަދުގެ މި ރަސްމިއްޔާތާއެކު، އަލަށް ހުވާކުރި 255 ދަރިވަރުން މިހާރު ވަނީ ރަސްމީކޮށް ދިވެހި ގައުމީ ދިފާއީ ބާރުގެ ހިދުމަތާ ގުޅިފައެވެ.
