އީރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް (އައިއާރުޖީސީ) އާއި އީރާނުގެ އަސްކަރިއްޔާއިން ގުޅިގެން، މެދުއިރުމަތީގެ އެކި ޤައުމުތަކުގައި ހުރި އެމެރިކާގެ އަސްކަރީ މަރުކަޒުތަކަށް އަމާޒުކޮށް ވަރުގަދަ މިސައިލް އަދި ޑްރޯން ޙަމަލާތަކެއް ދީފިއެވެ. މި ޙަމަލާތައް ސީދާ އަމާޒުވެފައިވަނީ ކުވައިތާއި އުރުދުންގައި ހުރި އެމެރިކާގެ އެންމެ މުހިންމު ވައިގެ ބޭސްތަކަށެވެ.
އައި.އާރު.ޖީ.ސީ އިން ބުނިގޮތުގައި، އެމެރިކާ ސިފައިން ތިބޭ ކުވައިތުގެ ޢަލީ އަލް-ސާލެމް އެއާ ބޭހަށް ވަނީ ގިނަ އަދަދެއްގެ ބެލިސްޓިކް މިސައިލާއި ޑްރޯން ފޮނުވާލާފައެވެ. މި ޙަމަލާ އަމާޒުކޮށްފައިވަނީ އެ ބޭހުގައި އެމެރިކާ ސިފައިން އެއްވެ ތިބި ސަރަހައްދަކަށާއި، އެތަނުގައި ހުރި ކުރިއާލާ އިންޒާރުދޭ ރާޑަރު ނިޒާމަށެވެ.
ހަމައެއާއެކު، އީރާނުގެ އަސްކަރިއްޔާގެ ޑްރޯން ލަޝްކަރުން ވަނީ އުރުދުންގެ އަޒްރަޤްގައި ހުންނަ އެމެރިކާގެ އަސްކަރީ މަރުކަޒަށް ވެސް ހަމަލާދީފައެވެ. މި ހަމަލާގައި އެމެރިކާގެ މުވާޞަލާތީ ނިޒާމުތަކަށާއި، ރާޑަރު ސައިޓުތަކުގެ އިތުރުން ތެޔޮ ގުދަންތަކަށް ބޮޑެތި ގެއްލުންތަކެއް ވަނީ ލިބިފައެވެ.
މި ޙަމަލާތަކާ ގުޅިގެން ކައިރީގައި އޮތް ބަހުރައިންގައި ވެސް ވަނީ ނުރައްކަލުގެ ސައިރަން އަޅާފައެވެ. އެމެރިކާގެ ސެންޓްރަލް ކޮމާންޑުން މި ޙަމަލާތަކުގައި ލިބުނު ގެއްލުމުގެ ތަފްސީލު ހާމަކުރުމުގެ މަސައްކަތް މިހާރު ދަނީ ކުރަމުންނެވެ.
