ތ. ވޭމަންޑޫގައި ހަރަކާތްތެރިވާ ވެޔޮ ގްރޫޕާއި ރާޅު ކްރެސްޓްގެ ފަރާތުން، އެ ރަށު އަންހެނުންގެ ތަރައްގީއަށް މަސައްކަތްކުރާ ކޮމިޓީއަށް ވޮލީ ކޯޓެއް ތަރައްގީކުރުމަށް ބޭނުންވާ އެންމެފަހުގެ ޒަމާނީ ސާމާނު ހަދިޔާކޮށްފިއެވެ.
ވޭމަންޑޫ ރައްޔިތުންގެ މެދުގައި ކުޅިވަރުގެ ރޫހު އާލާކޮށް، ދުޅަހެޔޮ މުޖުތަމައެއް ބިނާކުރުމަށްޓަކައި ވެޔޮ ގްރޫޕާއި ރާޅު ކްރެސްޓުން އިސްނަގައިގެން ކުރިއަށްގެންދިޔަ މި ދީލަތީ އެހީގެ ދަށުން، ވޮލީ ކޯޓު ތަރައްގީކުރުމަށް ބޭނުންވާ މުހިންމު ހުރިހާ ސާމާނެއް ވަނީ އެ ރަށު އަންހެނުންގެ ކޮމިޓީއާ ހަވާލުކޮށްފައެވެ.
މި ސާމާނުތަކަކީ މިހާރު ކުޅިވަރުގެ ދާއިރާގައި ބޭނުންކުރާ އެންމެފަހުގެ ޒަމާނީ ވަސީލަތްތަކެއްކަން ފާހަގަކޮށްލެވެއެވެ.
ވެޔޮ ގްރޫޕަކީ 2005 ވަނަ އަހަރުން ފެށިގެން ވޭމަންޑޫގައި ފުޅާދާއިރާއެއްގައި ވިޔަފާރިކުރަމުން އަންނަ ކުންފުންޏެކެވެ. އެ ކުންފުނިން އަންނަނީ ވޭމަންޑޫގެ ތަރައްގީއަށާއި، އިޖުތިމާއީ އެކި ކަންކަމުގައި މެދުނުކެނޑި ބޮޑެތި އެހީތެރިކަން ފޯރުކޮށްދެމުންނެވެ. މީގެ ކުރިންވެސް އެ ރަށުގެ ތަރައްގީއަށްޓަކައި ގިނަގުނަ މަސައްކަތްތަކެއް އެ ކުންފުނިން ވަނީ ކޮށްފައެވެ.
ރަށުގެ ތަރައްގީއަށްޓަކައި ވެޔޮ ގްރޫޕާއި ރާޅު ކްރެސްޓުން ދެމުންގެންދާ މި އެހީތެރިކަމަކީ، އަތޮޅުތެރޭގެ ރަށްރަށުގައި ހަރަކާތްތެރިވާ އެހެނިހެން ޖަމުއިއްޔާތަކާއި އެންޖީއޯތަކުންނާއި، ވިޔަފާރިވެރިންވެސް ނަމޫނާ ލިބިގަންނަންވީ ފުރިހަމަ މިސާލެއްގެ ގޮތުގައި އެ ރަށުގެ ރައްޔިތުން ދެކެއެވެ.
