އެމެރިކާއިން އީރާނުގެ ބަނދަރުތައް އަސްކަރީ ގޮތުން ބަންދުކޮށް، އީރާނުގެ އައްސޭރިފަށުގެ ދިފާއީ ނިޒާމުތަކަށާއި މިސައިލް މަރުކަޒުތަކަށް ދެ ފިޔަވައްސަކަށް ބަހާލައިގެން ވަރުގަދަ ވައިގެ ޙަމަލާތަކެއް ދީފިއެވެ.
— U.S. Central Command (@CENTCOM) July 15, 2026
ވައިގެ ޙަމަލާތަކުގެ ތަފްސީލު:
– ފުރަތަމަ ފިޔަވަހި: އެމެރިކާގެ ސެންޓްރަލް ކޮމާންޑް (ސެންޓްކޮމް) އިން ބުނިގޮތުގައި، ބުދަ ދުވަހުގެ ހެނދުނު ގްރޭޓަރ ޓުންބް ޖަޒީރާގައި ހުރި އީރާނުގެ ކްރޫޒް މިސައިލް ފޮނުވާ މަރުކަޒުތަކަށް 90 މިނެޓުގެ ވަރުގަދަ ޙަމަލާތަކެއް ވަނީ ދީފައެވެ.
– ދެވަނަ ފިޔަވަހި: އޭގެ 9 ގަޑިއިރު ފަހުން، އީރާނުގެ ބޮޑެތި ސިޓީތައް ކަމަށްވާ ބަންދަރު އައްބާސް، އަހްވާޒް، ކޮނަރަކް، ސިރިކް، އަދި ޤޭޝްމް ޖަޒީރާގައި ހުރި ކޮމާންޑް ސެންޓަރުތަކަށާއި ޑްރޯން މަރުކަޒުތަކަށް ވަނީ ހަމަލާދީފައެވެ. ޚޮންދާބް ސިޓީއަށް ދިން ހަމަލާތަކާ ގުޅިގެން ވެރިރަށް ތެހެރާންގެ އެއާ ޑިފެންސް ނިޒާމުތައް ވެސް ވަނީ އެކްޓިވްކޮށްފައެވެ.
– ހޮސްޕިޓަލް ހުސްކުރުން: އަހްވާޒްގައި އެމެރިކާއިން ދިން ހަމަލާއެއް ކުޑަކުދިންގެ ކެންސަރު ބައްޔަށް ފަރުވާދޭ ހޮސްޕިޓަލެއްގެ ކައިރިއަށް އެރުމުގެ ސަބަބުން، ބަލިކުދިން ގޮވައިގެން މަގުމައްޗަށް ނުކުންނަން އާއިލާތަކަށް ވަނީ މަޖުބޫރުވެފައެވެ.
ބްލޮކޭޑް ވަރުގަދަކުރުން
ހުރުމްޒް ކަނޑުއޮޅި ބަންދުކުރުމާ ގުޅިގެން ދުނިޔޭގެ ތެލުގެ އަގު ވަނީ ބަރެލްއަކަށް 84.95 ޑޮލަރަށް އުފުލިފައެވެ. އެމެރިކާއިން ދަނީ ކަނޑުއޮޅި ހުޅުވުމަށްޓަކައި އީރާނުގެ އަސްކަރީ ޤާބިލުކަން ނައްތާލުމަށް މަސައްކަތް ކުރުމުންނެވެ. އެގޮތުން، އެމެރިކާގެ އިންޒާރުތަކަށް ބީރުކަންފަތެއްދީ އީރާނުގެ ޚާރްގް ޖަޒީރާއާ ދިމާއަށް ދަތުރުކުރި ’އެމް.ޓީ ބެލްމާ‘ ތެޔޮ ޓޭންކަރަށް ހެލްފަޔަރ މިސައިލުން ހަމަލާދީ ވަނީ ހުއްޓުވާފައެވެ.
އަމާންދިނުމުގެ ވާހަކަތަކާއި ޤައިދީއަކު ދޫކޮށްލުން:
ޕެންސިލްވޭނިއާގައި ބޭއްވި އަސްކަރީ ސަމިޓެއްގައި ވާހަކަދައްކަމުން ރައީސް ޑޮނަލްޑް ޓްރަމްޕް ބުނީ އީރާނުން ވަރަށް އަވަހަށް ބަލިކުރާނެ ކަމަށާއި، އީރާނުން އޮތީ ސުލްހަވާން އިންތިހާއަށް ބޭނުންވެފައި ކަމަށެވެ. ހަނގުރާމަ ހޫނުވެފައިވީ ނަމަވެސް، އީރާނުން ވަނީ 2024 ވަނަ އަހަރުން ފެށިގެން ހައްޔަރުކޮށްފައި ހުރި އެމެރިކާގެ ރައްޔިތެއް ކަމަށްވާ ޑީނާ ކަރާރީ މިނިވަންކޮށްފައެވެ. ޓްރަމްޕް ވަނީ މިއީ އީރާނުން ދެއްކި ހެޔޮނިޔަތުގެ ނިޝާނެއް ކަމަށް ބުނެ ޝުކުރު އަދާކޮށްފައެވެ.
