ތައިލެންޑުގެ ބެންކޮކްގައި ކުރިއަށްދާ ހަލާލް ކާބޯތަކެތީގެ މައުރަޒެއްގައި މިފްކޯގެ މަހުގެ އުފެއްދުންތައް ދައްކާލައި، ބައިނަލްއަގުވާމީ ބާޒާރަށް ތައާރަފުކޮށްފިއެވެ.
މި މަހުގެ 15 ވަނަ ދުވަހުން ފެށިގެން 17 ވަނަ ދުވަހާއި ހަމައަށް ބެންކޮކް އިންޓަރނޭޝަނަލް ޓްރޭޑް އެންޑް އެގްޒިބިޝަން ސެންޓަރުގައި ކުރިއަށްދާ މި މައުރަޒުގައި މިފްކޯއިން ބައިވެރިވެފައިވަނީ ތައިލެންޑުގައި ހުންނަ ދިވެހި އެމްބަސީގެ އެހީތެރިކަމާއެކުގައެވެ.
މިއީ ދުނިޔޭގެ ފެންވަރުގައި ބޭއްވޭ އެންމެ ބޮޑު އެއް ހަލާލް ކާބޯތަކެތީގެ މައުރަޒަށްވާއިރު، މިއީ ރާއްޖޭގެ ދެމެހެއްޓެނިވި މަސްވެރިކަމުގެ އުފެއްދުންތަކާއި ދިވެހިވަންތަ ރަހަތައް ބައިނަލްއަގުވާމީ ބާޒާރުގައި އިޝްތިހާރު ކުރުމަށް ލިބުނު މުހިންމު ފުރުސަތެއް ކަމަށް މިފްކޯއިން ފާހަގަކުރެއެވެ. އެ ކުންފުނިން ހާމަކުރި ގޮތުގައި، މި މައުރަޒުގެ ސަބަބުން ވިޔަފާރީގެ އާ ފުރުސަތުތައް ފަހިވެ، ބައިނަލްއަގުވާމީ ބައިވެރިންނާ އޮންނަ ގުޅުން އިތުރަށް ބަދަހިވެގެންދާނެއެވެ.
އަދި މިއީ ތިމާވެއްޓާ ރައްޓެހި ދިވެހި މަސްވެރިކަމުގެ އުފެއްދުންތައް ދުނިޔޭގެ ބާޒާރަށް ފޯރުކޮށްދިނުމަށް ރާއްޖެއިން ވެފައިވާ އިގުރާރު ދައްކުވައިދޭ ކަމެއް ކަމަށްވެސް އެ ކުންފުނިން ވަނީ ބުނެފައެވެ.
ދުނިޔޭގެ 70 އަށްވުރެ ގިނަ ގައުމުން މަންދޫބުން ބައިވެރިވާ މި މައުރަޒަށް 12،000 އާއި 15،000 އާ ދެމެދުގެ އަދަދަކަށް މީހުން ޒިޔާރަތް ކުރާނެ ކަމަށް ލަފާކުރެވެއެވެ. ރާއްޖެއިން އެންމެ ގިނައިން މަސް ބޭރުކުރާ ގައުމަކީ ތައިލެންޑް ކަމަށްވާއިރު، މިހާރު ގިނައިން ބޭރުކުރާ ރޯމަހުގެ އިތުރުން، މިފްކޯގެ އަގު އެއްކުރި އުފެއްދުންތައް އެ ގައުމުގެ ބާޒާރުގައި ޕްރޮމޯޓް ކުރުމަށް މި ހަރަކާތުގެ ތެރެއިން ބޮޑު އިސްކަމެއްދެއެވެ.
ސަރުކާރުގެ މައިގަނޑު އަމާޒަކީ ދިވެހި މަސްވެރިކަމުގެ އުފެއްދުންތަކަށް މިހާރު ހުރި މާކެޓުތައް ފުޅާކޮށް، އައު މާކެޓުތަކަށް ދިވެހި އުފެއްދުންތައް ތައާރަފުކުރުމެވެ. ތައިލެންޑް އެމްބަސީގެ އެހީތެރިކަމާއެކު މިފްކޯއަށް ލިބުނު މި ފުރުސަތަކީ ވިޔަފާރިވެރިންނާ ސީދާ ބައްދަލުކޮށް އޭޝިއާ ސަރަހައްދުގެ ފެންވަރު ރަނގަޅު ބަޔާސް އަދި ޑިސްޓްރިބިއުޓަރުންނަށް ރާއްޖޭގެ ދޮށީގެ މަސްވެރިކަމުގެ އުފެއްދުންތައް ދައްކާލުމަށް ލިބުނު ރަން ފުރުސަތެކެވެ.
