ގަވާއިދާ ހިލާފަށް ރާއްޖޭގައި ދިރިއުޅެމުންދިޔަ 12,000 އަށްވުރެ ގިނަ ބިދޭސީން އަނބުރާ ގައުމަށް ފޮނުވާލާފައިވާ ކަމަށް އިމިގްރޭޝަނުން ހާމަކޮށްފިއެވެ.
ބިދޭސީންގެ މައްސަލައަށް ދާއިމީ ހައްލެއް ހޯދުމަށް ސަރުކާރުން ފަށާފައިވާ މަސައްކަތްތަކުގެ ދަށުން، އިމިގްރޭޝަނާއި ހޯމް މިނިސްޓްރީ ގުޅިގެން ދަނީ ހަލުވި މިނެއްގައި ހާއްސަ އޮޕަރޭޝަންތަކެއް ހިންގަމުންނެވެ. އިމިގްރޭޝަނުން މައުލޫމާތު ދީފައިވާ ގޮތުގައި، 17 ނޮވެމްބަރު 2023 ވަނަ ދުވަހުން ފެށިގެން މި އަހަރުގެ ޖޫން މަހުގެ 13 ވަނަ ދުވަހުގެ ނިޔަލަށް، ޖުމްލަ 12,552 ބިދޭސީން ވަނީ ރާއްޖެއިން ފޮނުވާލާފައެވެ. މީގެ ތެރޭގައި ގަވާއިދާ ހިލާފަށް އުޅުމުގެ ސަބަބުން ޑީޕޯޓްކުރި ފަރާތްތަކުގެ އިތުރުން، އެކި ސަބަބުތަކާ ހުރެ ފޮނުވާލެވުނު މީހުން ހިމެނެއެވެ.
ވަކިން ހާއްސަކޮށް ރާއްޖޭގައި ގަވާއިދާ ހިލާފަށް ވިޔަފާރިކުރާ ބިދޭސީންނާއި، ސައްހަ ލިޔެކިޔުން ނެތް ފަރާތްތައް ދެނެގަތުމަށް މާލެ ސަރަހައްދާއި އަތޮޅުތަކުގައި ސިލްސިލާ ރެއިޑްތަކެއް ދަނީ ކުރިއަށް ގެންދަމުންނެވެ.
ބިދޭސީންގެ މައްސަލަ ހަރުދަނާ އުސޫލެއްގެ ދަށުން ހައްލުކުރުމަށްޓަކައި، ވޯކް ޕާމިޓްތަކުގެ ސައްހަކަން ކަށަވަރުކުރުމުގެ މަސައްކަތްވެސް މިހާރު ވަނީ ވަރުގަދަކޮށްފައެވެ. ތަފާސްހިސާބުތަކުން ދައްކާގޮތުގައި، މިހާރު ރާއްޖޭގައި ސައްހަ ވޯކް ޕާމިޓާއެކު 208,937 ބިދޭސީން އުޅެމުންދާއިރު، މީގެ ތެރެއިން 2 ލައްކައަށްވުރެ ގިނަ މީހުންގެ ބަޔޯމެޓްރިކްސް ވަނީ ނަގާފައެވެ.
މި ނިޒާމު އިތުރަށް ހަރުދަނާކުރުމުގެ ގޮތުން، ގަވާއިދާ ޚިހިފަށް އުޅޭ ބިދޭސީންގެ މައުލޫމާތު އާންމުންނަށް ސިއްރުކަމާއެކު ރިޕޯޓްކުރެވޭނެ ”އިމިގްރޭޝަން ވޮޗް“ ޕްލެޓްފޯމް މިހާރު ވަނީ ތައާރަފުކޮށްފައެވެ. ގަވާއިދާ ހިލާފު އެއްވެސް އަމަލެއް ފާހަގަވެއްޖެނަމަ ލަސްނުކޮށް އެކަން ރިޕޯޓް ކުރުމަށް އިމިގްރޭޝަނުން ވަނީ އިލްތިމާސްކޮށްފައެވެ.
