ފީފާ ވޯލްޑްކަޕް 2026 ގެ ދެވަނަ ސެމީ ފައިނަލްގައި ރޭ އިންގްލެންޑާ ދެކޮޅަށް ކުޅުނު ފޯރިގަދަ މެޗު 2-1 އިން ކާމިޔާބުކޮށް، އެންމެ ފަހުގެ ޗެމްޕިއަން އާޖެންޓީނާ މުބާރާތުގެ ފައިނަލަށް ދަތުރުކޮށްފިއެވެ.
އެމެރިކާގެ އެޓްލާންޓާ ސްޓޭޑިއަމްގައި ކުޅުނު މި މެޗަކީ ފުޓްބޯޅައިގެ ތާރީޚުގައި އުފެދިފައިވާ އެންމެ ވާދަވެރި އެއް ރައިވަލްރީ އާކޮށްދިން މެޗެކެވެ. 1986 ވަނަ އަހަރު މަރަޑޯނާ ޖެހި ”ހޭންޑް އޮފް ގޯޑް“ ލަނޑާއި، 1998 ގައި ޑޭވިޑް ބެކަމްއަށް ދެއްކި ރަތް ކާޑުގެ ހަނދާންތަކާއެކު، މި މެޗު ފެށުނީވެސް ދެ ގައުމުގެ ދެމެދުގައި ސިޔާސީ ބަަހުގެ ހަމަލާތަކެއް ބަދަލުކުރެވެމުންދަނިކޮށެވެ. އެގޮތުން އާޖެންޓީނާގެ ނައިބު ރައީސް ވިކްޓޯރިއާ ވިލަރޫއަލް ވަނީ އިންގްލެންޑަށް ނިސްބަތްކޮށް ”ފޭރޭ ކަނޑުފޭރޭން“ (pirates) ފަދަ ބަސްތަކުން މުޚާތަބު ކުރައްވާފައެވެ.
ބުދަ ދުވަހު ކުޅުނު މި މެޗުގެ ފުރަތަމަ ހާފުގައި ދެ ޓީމުގެ ކުޅުންތެރިންގެ މެދުގައި ބަހުގެ ހަމަލާތައް ބަދަލުކުރުމާއި، ގިނަ ފައުލްތަކެއް ފެނިގެން ގޮސްފައިވެއެވެ. މިއީ މި މުބާރާތުގައި އެންމެ ފަހުގެ ޗެމްޕިއަން އާޖެންޓީނާ، ދުނިޔޭގެ ރޭންކިންގެ ގަދަ 10 އެއްގައި ހިމެނޭ ވަރުގަދަ ޓީމަކާ ބައްދަލުކުރާ ފުރަތަމަ މެޗަށްވުމުން، ދަނޑުމަތީގެ މަސްލަހަތު އޮތީ ވަރަށް ބޮޑަށް ހޫނުވެފައެވެ. މެޗުގެ ކުރީކޮޅުން ފެށިގެން ދެ ޓީމުގެ ކުޅުންތެރިންގެ މެދުގައި ހަމަނުޖެހުންތަކެއް ހިނގައި، ރެފްރީއަށް ވަނީ ކުޅުންތެރިން މައިތިރިކުރުމަށް ގިނަ މަސައްކަތްތަކެއް ކުރަން ޖެހިފައެވެ. ޚާއްޞަކޮށް ފައުލްތަކާ ގުޅިގެން އުފެދުނު ޚިޔާލުތަފާތުވުންތަކުގެ ސަބަބުން މެޗުގެ ފޯރި ވަނީ އިތުރަށް ގަދަވެފައެވެ.
މެޗުގެ ފުރަތަމަ ހާފުގައި ދެ ޓީމަށްވެސް ލަނޑެއް ކާމިޔާބު ކުރެވިފައި ނުވި ނަމަވެސް، މެޗުގެ ފޯރިގަދަވެގެން ދިޔައީ ދެވަނަ ހާފުގައެވެ. މެޗުގެ 55 ވަނަ މިނެޓުގައި އެންތަނީ ގޯޑަން ޖަހައިދިން ލަނޑާއެކު އިންގްލެންޑުން ލީޑު ނެގިއެވެ. ނަމަވެސް، މެޗުގެ ފަހު ދިހަ މިނެޓުގެ ތެރޭގައި އާޖެންޓީނާ އިން ވަނީ ކުޅުން ވަރުގަދަކޮށް މެޗުގެ ނަތީޖާ އަނބުރާލާފައެވެ.
އެގޮތުން 86 ވަނަ މިނެޓުގައި އެންޒޯ ފެނާންޑޭޒް ފޮނުވާލި ހިތްގައިމު ހަމަލާއަކުން އާޖެންޓީނާއަށް ނަތީޖާ ހަމަހަމަކޮށްދިނެވެ. އަދި މެޗުގެ ފުރިހަމަ ވަގުތު ހަމަވެ، އިތުރުވަގުތުގެ ގޮތުގައި ދެއްކި 9 މިނެޓުގެ ތެރެއިން 90+2 ވަނަ މިނެޓުގައި ލައުޓާރޯ މާޓިނޭޒް ބޮލުން ޖެހި ލަނޑާއެކު އާޖެންޓީނާ ފައިނަލުގެ ޖާގަ ކަށަވަރުކުރިއެވެ. މި ލަނޑު ޖެހުމަށް ފުރުސަތު ތަނަވަސްކޮށްދިނީ ކެޕްޓަން ލިއޮނަލް މެސީއެވެ.
މި ނަތީޖާއާއެކު އިންގްލެންޑުން 1966 ގެ ފަހުން ފުރަތަމަ ފަހަރަށް ވޯލްޑްކަޕް ފައިނަލަށް ދިއުމަށް ކުރި އުއްމީދު ވަނީ ފެނަށް ގޮސްފައެވެ. އަނެއްކޮޅުން އާޖެންޓީނާ ވެގެން ގޮސްފައިވަނީ 1962 ވަނަ އަހަރު ބްރެޒިލްގެ ފަހުން، ވޯލްޑްކަޕްގެ ތަށި ދިފާއުކުރުމުގެ ފުރުސަތު ފައިނަލުގައި ލިބުނު ފުރަތަމަ ގައުމަށެވެ.
އާދިއްތަ ދުވަހު ކުޅުމަށް ހަމަޖެހިފައިވާ ފައިނަލް މެޗުގައި އާޖެންޓީނާ ބައްދަލުކުރާނީ މިހާރުވެސް ފައިނަލުން ޖާގަ ހޯދާފައިވާ ސްޕެއިންއާއެވެ. އާޖެންޓީނާ އަމާޒު ހިފާފައިވަނީ ތާރީޚުގައި ތަށި ދިފާއުކުރި ތިންވަނަ ގައުމުގެ ޝަރަފު ހޯދުމަށެވެ.
