މާލޭ ބޮޑުތަކުރުފާނު މަގުގެ ބާކީ އޮތް ބައިގައި ތާރުއެޅުމުގެ މަސައްކަތް މިއަދުގެ ނިޔަލަށް ނިންމާލެވޭނެ ކަމަށް މޯލްޑިވްސް ޓްރާންސްޕޯރޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އިން ބުނެފިއެވެ.
ހެންވޭރު ފެރީ ޓަރމިނަލުން ފެށިގެން ޢިއްޒުއްދީން ފާލަމާ ހަމައަށް ހިމެނޭ ސަރަހައްދުގައި ތާރުއަޅައިގެން ޒަމާނީ ފެންވަރަކަށް ތަރައްގީކުރުމުގެ އަމަލީ މަސައްކަތް ފަށާފައިވަނީ މި އަހަރުގެ މާރިޗު މަހުގެ 23 ވަނަ ދުވަހުއެވެ. މި މަޝްރޫއުގެ ދަށުން ހެންވޭރު ފެރީ ޓަރމިނަލުން ފެށިގެން ފޮރިން މިނިސްޓްރީއާ ހަމައަށް ތާރުއަޅައި މި މަހުގެ އަށްވަނަ ދުވަހު ވަނީ ނިންމާފައެވެ.
ފޮރިން މިނިސްޓްރީން ފެށިގެން ރަސްމީ ފާލަމާ ހަމައަށް ހިމެނޭ ސަރަހައްދުގެ ސަބް ބޭސް އާއި އޭބީސީ ލޭޔަރ އެޅުމުގެ މަސައްކަތް އެއްކޮށް ނިމިފައިވާއިރު، އެ ސަރަހައްދުގައި ތާރުއެޅުމުގެ އެންމެފަހުގެ މަސައްކަތްތައް މިއަދު ނިމޭނެއެވެ.ސަރުކާރުގެ މުހިންމު އޮފީސްތައް ހިމެނޭ މި މަގަކީ ކުރިން ގާ އަތުރާފައި އޮތް މަގެކެވެ. ނަމަވެސް، މަރާމާތު ނުކޮށް ގިނަދުވަސްވުމުގެ ސަބަބުން މަގު ހަލާކުވެ، އަޑިގުޑަންތައް ގިނަވުމުގެ ސަބަބުން މި މަގުގައި ދަތުރުފަތުރު ކުރުމާއި ޕާކުކުރުމުގައި ބޮޑެތި ދަތިތަކެއް ވަނީ ކުރިމަތިވެފައެވެ.
މި މަޝްރޫއު ނިމިގެންދާއިރު މަގުގައި ޕާކުކުރެވޭނެ އިންތިޒާމާއި، މަސްވެރިންގެ ޕާކު ސަރަހައްދު ޒަމާނީ ފެންވަރަށް ތަރައްގީކުރެވިގެންދާނެ ކަމަށް އެމްޓީސީސީން ވަނީ މައުލޫމާތުދީފައެވެ.
ބޮޑުތަކުރުފާނު މަގު ތަރައްގީކުރުމުގެ މަޝްރޫއުގެ ދަށުން ނޯތު ހާބަރުން ފެށިގެން ޖުމްހޫރީ މައިދާނާ ހަމައަށް މިހާރު ވެސް ވަނީ ތާރުއަޅައި ބޭނުންކުރަން ފަށައިފައެވެ. މި މަގު ފުޅާކޮށް ތަރައްގީކުރުމާ ގުޅިގެން އެ ސަރަހައްދުގެ ޓްރެފިކް ތޮއްޖެހުމުގެ މައްސަލައަށް ހައްލެއް ލިބިގެން ގޮސްފައިވާ ކަމަށް މަގު ބޭނުންކުރާ ފަރާތްތަކުން އަންނަނީ ބުނަމުންނެވެ.
