މަސްވެރިންގެ އަތުން މަސްގަތުމަށްޓަކައި ސަރުކާރުގެ ބަޖެޓުން މިފްކޯއަށް އެންމެ ރުފިޔާއެއްވެސް މިހާރު ދެމުން ނުދާކަމަށް ފިޝަރީޒް މިނިސްޓަރު އަޙްމަދު ޝިޔާމް މިއަދު ވިދާޅުވެއްޖެއެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި މެންބަރަކު ކުރެއްވި ސުވާލަކަށް ޖަވާބުދެއްވަމުން މިނިސްޓަރު ޝިޔާމް ވިދާޅުވީ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ މައިގަނޑު ސިޔާސަތަކީ މިފްކޯއަކީ އަމިއްލަ ފައިމައްޗަށް ތެދުވެގެން ހިންގާ، މާލީގޮތުން ދެމެހެއްޓެނިވި ކުންފުންޏަކަށް ހެދުން ކަމަށެވެ. އަދި މި ސަރުކާރުގެ ވެރިކަމުގެ ފުރަތަމަ ދުވަހުން ފެށިގެން އެ މަގަށް މަސައްކަތް ކުރައްވަމުން ގެންދަވާކަން މިނިސްޓަރު ފާހަގަކުރެއްވިއެވެ.
މިނިސްޓަރު ވިދާޅުވި ގޮތުގައި ނިމިދިޔަ އެމްޑީޕީ ސަރުކާރުން ސިޔާސީ ބޭނުމަށްޓަކައި މަހުގެ އަގު އިންތިހާއަށް ބޮޑުކޮށް، ކިލޯއަކަށް 13 ރުފިޔާގެ ސަބްސިޑީއެއް ދޭންޖެހޭ ގޮތަށް އޮތުމުން ދައުލަތުން ބިލިއަނުން ހަރަދުކުރަން ޖެހުނެވެ. ނަމަވެސް އެ ބޮޑު ހޭދަ މަސްވެރިކަމުގެ އިންފްރާސްޓްރަކްޗަރ ތަރައްގީކުރުމަށާއި، މަސް ބަންދުކުރާ ފެކްޓްރީތައް އެޅުމަށް ބޭނުންކޮށްފައި ނުވާތީ މިނިސްޓަރު ވަނީ ކަންބޮޑުވުން ފާޅުކުރައްވާފައެވެ.
”އަޅުގަނޑު މިއަދު ދަންނަވަން ކެރޭ، އަޅުގަނޑުމެން މިހާރު މިފްކޯއަކަށް މަސް ގަންނާކަށް އެންމެ ރުފިޔާއެއްވެސް ނުދެން. މިއީ ސިޔާސަތުތަކަށް ގެނެވުނު ބަދަލެއް،“ ޝިޔާމް ވިދާޅުވިއެވެ.
މަސްވެރިކަމުގެ ސިނާއަތަށް ގެންނަ އިސްލާހީ ބަދަލުތަކަށް އަލިއަޅުވާލައްވަމުން މިނިސްޓަރު ވިދާޅުވީ، ރާއްޖޭގެ މަސް ބޭރުކުރާ މިންވަރު ތިންގުނަ ކުރުމަށްޓަކައި މުހިންމު މަޝްރޫއުތަކެއް ކުރިއަށްދާ ކަމަށެވެ. އެގޮތުން ފެލިވަރުގެ ކެޕޭސިޓީ 100 ޓަނަށް އިތުރުކުރުމާއި، ފ. ނިލަންދޫގެ އިތުރުން ގދ. ފިޔޯރީގައި މަސް ފެކްޓްރީ ތަރައްގީކުރުމުގެ މަސައްކަތްތައް ކުރިއަށްދާކަން މިނިސްޓަރު ފާހަގަކުރެއްވިއެވެ.
މީގެ އިތުރުން، މި ސަރުކާރުން އަމިއްލަ ކުންފުނިތަކަށްވެސް ހަމަހަމަ ފުރުސަތުތަކެއް ފަހިކޮށްދީ، މަސްވެރިކަމުގެ ވިޔަފާރިއަށް ހެޔޮ މާހައުލެއް ގާއިމުކޮށްދީފައިވާ ކަމަށް މިނިސްޓަރު ވިދާޅުވިއެވެ. މި ސިޔާސަތުތަކުގެ ނަތީޖާއެއްގެ ގޮތުން މަހުގެ އަގު އުފުލި، މަސްވެރިންގެ ޖީބުތަކަށް ލިބޭ އާމްދަނީ އިތުރުވެގެންދާނެކަމުގެ ޔަގީންކަން މިނިސްޓަރު ޝިޔާމް ވަނީ ދެއްވާފައެވެ.
