މާލޭގެ ބޮޑުތަކުރުފާނު މަގު ޒަމާނީ ފެންވަރަކަށް ތަރައްގީކުރުމުގެ މަސައްކަތް މި ސަރުކާރުން ނިންމާލުމާއެކު އެއީ ނިމިދިޔަ އެމްޑީޕީ ސަރުކާރުން ފެށި މަޝްރޫއެއް ކަމަށް ބުނެ މާލެ ސިޓީ ކައުންސިލްގައި މަސައްކަތްކުރާ މުވައްޒަފަކު މަޝްރޫއުގެ ކްރެޑިޓް ނަގަން މަސައްކަތްކޮށްފިއެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން މާލެ ސިޓީގެ އިންފްރާސްޓްރަކްޗަރ ހަރުދަނާކުރުމަށް ކުރައްވަމުންގެންދަވާ މަސައްކަތްތަކުގެ ދަށުން، ބޮޑުތަކުރުފާނު މަގު ޒަމާނީ ފެންވަރަށް ތަރައްގީކޮށް މިހާރު ވަނީ އާންމުންނަށް ހުޅުވާލާފައެވެ. ނަމަވެސް، މި މަޝްރޫއު ނިމުމާއެކު މި މަޝްރޫއުގެ ކްރެޑިޓް ލިބެންޖެހޭ ހަގީގީ ފަރާތަކީ ކޮބާކަމާމެދު މީސް މީޑިއާގައި މިހާރު ވަނީ ބަހުސެއް އުފެދިފައެވެ.
އެގޮތުން މާލެ ސިޓީ ކައުންސިލްގައި މަސައްކަތްކުރާ އެމްޑީޕީގެ އެކްޓިވިސްޓް ޝަތުފާ ޝަފީޢު ބުނެފައިވަނީ، ބޮޑުތަކުރުފާނު މަގު ތަރައްގީކުރުމުގެ މަޝްރޫއަކީ ނިމިދިޔަ އެމްޑީޕީ ސަރުކާރުން ރާވައި، ފަށާފައިވާ މަޝްރޫއެއް ކަމަށެވެ. އޭނާ ބުނެފައިވާ ގޮތުގައި މިހާރުގެ ސަރުކާރުން ކުރި ކަމަކީ ކުރީ ސަރުކާރުން ފަށާފައި އޮތް މަޝްރޫއެއް ނިންމާލުމެވެ.
Project by MDP governmenthttps://t.co/uHNRDkELt7 https://t.co/pvuy9uqvYB
— Amna Shath (SHATHS) (@AmnaShath) July 14, 2026
މި މަޝްރޫއަކީ މާލޭގެ ދަތުރުފަތުރުގެ ނިޒާމަށް ދިމާވެފައިވާ ދަތިތައް ހައްލުކުރުމަށާއި، ވާރޭވެހި ފެންބޮޑުވާ މައްސަލައަށް ދާއިމީ ހައްލެއް ހޯދުމަށް މި ސަރުކާރުން ކުރިއަށްގެންދިޔަ މުހިންމު މަޝްރޫއެކެވެ. މި މަގު ތާރު އަޅައިގެން ޒަމާނީ ފެންވަރަކަށް ތަރައްގީކޮށްފައިވާއިރު، މިއީ މާލޭގެ ރީތިކަމާއި ތަރުތީބަށް ލިބުނު އިތުރު ކުރިއެރުމެކެވެ.
ނަމަވެސް އިދިކޮޅު ފަރާތްތަކުން ބުނަމުންދަނީ، މި ސަރުކާރުން އިފްތިތާހުކުރާ ގިނަ މަޝްރޫއުތަކަކީ ކުރީގެ ރައީސް އިބްރާހީމް މުޙައްމަދު ޞާލިޙްގެ ސަރުކާރުން ބަޖެޓު ހަމަޖައްސައި، އަމަލީ މަސައްކަތް ފަށާފައިވާ މަޝްރޫއުތަކެއް ކަމަށެވެ.
ރައީސް ޑރ. މުޢިއްޒުގެ ސަރުކާރުން އަންނަނީ މާލޭގެ އިތުރުން ރާއްޖޭގެ އެކި ކަންކޮޅުތަކުގައި ތަރައްގީގެ ގިނަ މަޝްރޫއުތަކެއް ބާރުމިނުގައި ކުރިއަށް ގެންދަމުންނެވެ. މިގޮތުން ބޮޑުތަކުރުފާނު މަގު ހެދުމަކީ މާލޭގެ ރައްޔިތުންނަށް ދަތުރުފަތުރުގައި ބޮޑު ލުޔެއް ލިބިގެންދާނެ ކަމެއް ކަމަށް މަގު ބޭނުންކުރާ ފަރާތްތަކުން ފާހަގަކުރެއެވެ.
ބޮޑުތަކުރުފާނު މަގު ތަރައްގީކުރުމުގެ މަސައްކަތް ކޮންސްޓްރަކްޝަން މިނިސްޓްރީން އެމްޓީސީސީއާއި ހަވާލުކުރީ މިދިޔަ އަހަރުގެ އޭޕްރީލް މަހުގެ ނުވަވަނަ ދުވަހު، 455 ދުވަހުގެ ތެރޭގައި މަސައްކަތް އެއްކޮށް ނިންމާ ގޮތަށެވެ. ނަމަވެސް އެ ކުންފުނިން މަގު ހެދުމުގެ އަމަލީ މަސައްކަތް ފަށާފައިވަނީ މިދިޔަ އަހަރުގެ އޮގަސްޓު މަހުގެ ތެރޭގައެވެ. މި މަޝްރޫއަށް 144 މިލިއަން ރުފިޔާ ހަރަދުވާނެއެވެ.
މި މަޝްރޫއުގެ ދަށުން ހެންވޭރު ފެރީ ޓަރމިނަލުން ފެށިގެން ނޯތު ހާބަރާ ހަމައަށް ޖުމްލަ 1،088 މީޓަރުގެ ސަރަހައްދެއްގައި ތާރުއަޅައިގެން ވަނީ ތަރައްގީކޮށްފައެވެ.
