ހުޅުމާލޭގައި ތަރައްގީކުރާ މީޑިއާ ވިލެޖުގެ މަސައްކަތް މި މަހުގެ ނިޔަލަށް ނިންމުމަށް އަމާޒު ހިފާފައިވާ ކަމަށް ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) އިން ހާމަކޮށްފިއެވެ.
މީޑިއާ ވިލެޖު މަޝްރޫއަކީ ރާއްޖޭގެ މީޑިއާތަކަށް ކުރިމަތިވެފައިވާ ޖާގައިގެ ދަތިކަމަށް ދާއިމީ ހައްލެއް ހޯދައިދިނުމުގެ ގޮތުން މި ސަރުކާރުން ވަރަށް އިސްކަމެއްދީގެން ކުރިއަށްގެންދާ މަޝްރޫއެކެވެ. ހުޅުމާލޭ ފުރަތަމަ ފިޔަވަހީގައި ހުންނަ މަންހަޓަން ގްރޭންޑް ހޮޓަލުގައި ތަރައްގީކުރާ މި މީޑިއާ ވިލެޖުގެ ފިނިޝިން މަސައްކަތްތައް ހަލުވި ދުވެއްޔެއްގައި ކުރިއަށްދާއިރު، ކަނޑައެޅިފައިވާ މުއްދަތަށް މަސައްކަތް ނިންމާލެވޭނެކަމުގެ ފުރިހަމަ ޔަގީންކަން އެޗްޑީސީން ދެއެވެ.
ވޯލްޑް އޮފް ބިޒްނަސް ޕްރައިވެޓް ލިމިޓެޑާ ހަވާލުކޮށްގެން ކުރިއަށްގެންދާ މި މަޝްރޫއަކީ، ކުރިން ސިޓީ ހޮޓަލެއް ތަރައްގީކުރުމަށް ހަމަޖެހިފައި އޮތް އިމާރާތެއްގައި ހިންގާ މަޝްރޫއެކެވެ. މި އިމާރާތުގައި މީޑިއާ ވިލެޖުގެ އިތުރުން ޔޫތު ސެންޓަރަކާއި، މެޑިކަލް ކޮލެޖެއް އަދި ތަރިކަ ކޮލެޖެއްވެސް ގާއިމުކުރުމަށް ވަނީ ނިންމާފައެވެ.
ޖުމްލަ 34 ޖާގަ ހިމެނޭ މި މީޑިއާ ވިލެޖުގެ ބޭނުން ހިފުމުގެ ފުރުސަތު މިއަހަރުގެ މެދުތެރޭގައި މީޑިއާތަކަށް ހުޅުވާލެވޭނެއެވެ. މީޑިއާތަކަށް ހާއްސަ ވިލެޖެއް ގާއިމުކޮށްދިނުމަކީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ރިޔާސީ ވައުދުފުޅެކެވެ.
