އީރާނުގެ އަސްކަރިއްޔާ އާއި އައި.އާރު.ޖީ.ސީ ގުޅިގެން ގަލްފުގެ އެތައް ޤައުމަކަށް ދިން ވަރުގަދަ މިސައިލް އަދި ޑްރޯން ޙަމަލާތަކަކާއެކު މުޅި ސަރަހައްދުގެ މަސްރަހު އެއްކޮށް ކޮންޓްރޯލުން ނެއްޓިއްޖެއެވެ.
ޔޫ.އޭ.އީ ގެ ތެޔޮ ޓޭންކަރުތަކަށް ހަމަލާދިނުން
ޔޫ.އޭ.އީ ގެ މިނިސްޓްރީ އޮފް ޑިފެންސުން ކަށަވަރުކޮށްދީފައިވާ ގޮތުގައި، އޮމާންގެ ކަނޑުގެ ސަރަހައްދުން ދަތުރުކުރަމުންދިޔަ ޔޫ.އޭ.އީ ގެ ދެ ތެޔޮ ޓޭންކަރެއް ކަމަށްވާ ’މޮމްބާސާ‘ އަދި ’ބާހިއާ‘ އަށް އީރާނުގެ ކްރޫޒް މިސައިލް ޙަމަލާތަކެއް ވަނީ އަރާފައެވެ. މި ހަމަލާގެ ސަބަބުން ދެ އުޅަނދުގައި ބޮޑު ރޯވުމެއް އުފެދި، އިންޑިއާއަށް ނިސްބަތްވާ ފަޅުވެރިއަކު މަރުވެ އިތުރު 8 މީހަކު ވަނީ ޒަހަމްވެފައެވެ. އަބޫދާބީން ވަނީ މިއީ ބައިނަލްއަޤްވާމީ ކަނޑުދަތުރުފަތުރަށް ދިން ނުރައްކާތެރި ޙަމަލާއެއް ކަމަށް ބުނެ އެކަން ހަރުކަށި އިބާރާތުން ކުށްވެރިކޮށްފައެވެ.
ގަލްފުގެ ޤައުމުތަކަށް ދިން ޙަމަލާތަކާއި ބަހުރައިންގެ ކަންބޮޑުވުން
މީގެ އިތުރުން، އީރާނުން ދިން ވަރުގަދަ ބެލިސްޓިކް މިސައިލް ޙަމަލާތަކާ ގުޅިގެން ބަހުރައިންގެ މިނިސްޓްރީ އޮފް އިންޓީރިއާއިން ވަނީ ރައްޔިތުން ރައްކާތެރި ހިޔާވަހިކަން ހޯދުމަށް އަންގައި، މުޅި ޤައުމުގައި ނުރައްކަލުގެ ސައިރަން އަޅާފައެވެ. އީރާނުގެ މި ޙަމަލާތައް އަމާޒުވެފައިވަނީ ބަހުރައިން އަދި ކުވައިތުގައި ހުރި އެމެރިކާގެ އަސްކަރީ މަރުކަޒުތަކަށާއި، އޮމާންގެ ރާޑަރު ސްޓޭޝަންތަކުގެ އިތުރުން އުރުދުންގެ ޕްރިންސް ޙަސަން އެއާ ބޭހަށެވެ.
އީރާނުން ބުނަމުންދަނީ މިއީ އެމެރިކާއިން އެ ޤައުމުގެ ބިމަށް ދެމުންދާ ހަމަލާތަކަށް ދިން ވަރުގަދަ ރައްދެއް ކަމަށެވެ.
