ނިމިދިޔަ އެމްޑީޕީ ސަރުކާރުން އިންތިހާއަށް ފައިސާ ޗާޕުކޮށްގެން ދައުލަތް ހިންގުމުގެ ނަތީޖާ މިއަދު ފެންނަމުންދަނީ ވަރަށް ހިތިކޮށް ކަމަށް ރައްޔިތުންގެ މަޖިލީހުގެ ހިތަދޫ މެދު ދާއިރާ ތަމްސީލުކުރައްވާ މެންބަރު އަޙްމަދު އަޒާން ވިދާޅުވެއްޖެއެވެ.
އަޒާން މިހެން ވިދާޅުވީ މަރުކަޒީ ބޭންކު (އެމްއެމްއޭ) ގެ ތަފާސްހިސާބުތަކަށް ރިއާޔަތްކުރައްވައި މީސްމީޑިއާގައި ހިއްސާކުރެއްވި ޕޯސްޓެއްގައެވެ. އެމްއެމްއޭގެ ހިސާބުތަކުން ދައްކާގޮތުގައި، އެމްޑީޕީ ސަރުކާރުގައި މަރުކަޒީ ބޭންކުން ދައުލަތަށް ފައިސާ ދޫކުރި މިންވަރު ވަނީ ދެގުނައަށްވުރެ އިތުރުވެފައެވެ.
MMA’s statistics show that central-bank financing of the government more than doubled under the MDP administration. Between the end of 2018 and the end of 2023, the MMA’s claims on the central government rose from MVR 6.25 billion to MVR 14.61 billion, while net claims increased…
— Ahmed Azaan (@axanner) July 13, 2026
އެގޮތުން 2018 ވަނަ އަހަރުގެ ނިޔަލަށް އެމްއެމްއޭއިން ދައުލަތަށް ދޫކޮށްފައިވާ ފައިސާގެ މިންވަރު 6.25 ބިލިއަން ރުފިޔާގައި ހުރިއިރު، 2023 ވަނަ އަހަރު ނިމުނުއިރު މި އަދަދު ވަނީ 14.61 ބިލިއަން ރުފިޔާއަށް އަރާފައިވާކަން އަޒާން ފާހަގަކުރެއްވިއެވެ. އަދި ނެޓް ކްލެއިމްސްގެ މިންވަރު 5.28 ބިލިއަނުން 12.61 ބިލިއަން ރުފިޔާއަށް އުފުލިފައިވާކަން އަޒާން ފާހަގަކުރެއްވިއެވެ.
އަޒާން ވިދާޅުވި ގޮތުގައި މިއީ ”މަނިޓަރީ ފައިނޭންސިންގް“ ނުވަތަ އާންމު ބަހުން ނަމަ ފައިސާ ޗާޕުކުރުމުގެ ސަބަބުން ދިމާވި މައްސަލައެކެވެ. މިކަމާ ގުޅިގެން އެ ދުވަސްވަރު ކަންބޮޑުވުން ފާޅުކުރުމުން، އޭރުގެ ފިނޭންސް މިނިސްޓަރު އިބްރާހީމް އަމީރު ވިދާޅުވަމުން ގެންދެވީ އިތުރުވާ ފައިސާ ލިކުއިޑިޓީ މާކެޓުން އަނބުރާ ނަގާނެ ކަމަށާއި ނަމަވެސް، އަމަލީ ގޮތުން އެކަން އެގޮތަށް ކުރެވިފައި ނުވާކަން އަޒާން ފާހަގަކުރެއްވިއެވެ.
މިއަދު ރާއްޖޭގެ އިންފްލޭޝަން ނުވަތަ ތަކެތީގެ އަގު އުފުލުމާއި ދިވެހި ރުފިޔާއަށް ކުރިމަތިވެފައިވާ ފިއްތުންތަކާ ބެހޭގޮތުން ކުރީގެ މިނިސްޓަރު އަމީރު ވާހަކަދައްކަވާއިރު، މި ނާޒުކު ހާލަތަށް ގައުމު ވެއްޓުމުގައި އޭނާގެ އަމިއްލަ ސިޔާސަތުތަކުގެ ދައުރެއް އޮތްކަން ހަނދާން ނައްތާލައްވާފައިވާ ކަމަށް ވިދާޅުވެ އަޒާން ވަނީ އަމީރަށް ވަރަށް ބޮޑަށް ފާޑު ވިދާޅުވެފައެވެ.
ފާހަގަކޮށްލަންޖެހޭ ގޮތުގައި، ރައީސުލްޖުމްހޫރިއްޔާ ޑރ. މުޙައްމަދު މުއިއްޒުގެ ސަރުކާރުން މަސައްކަތް ކުރައްވަމުން ގެންދަވަނީ މިފަދަ އިގްތިސާދީ ގޮންޖެހުންތަކުން ގައުމު ސަލާމަތްކޮށް، މާލީ ހަމަޖެހުން ގާއިމުކުރުމަށެވެ. އަދި އެކަމުގެ ހެޔޮ ނަތީޖާ މަޑުމަޑުން ނަމަވެސް އަންނަނީ ފެންނަމުންނެވެ.
