އިންޑިއާގެ ހަވާދުގެ 2 ބްރޭންޑަކުން ކެމިކަލް މާއްދާއެއް ފެނުމުން ރާއްޖޭގައި އެ ބްރޭންޑްތަކުގެ ބައެއް ބާވަތްތައް އެތެރެކުރުމާއި ވިއްކުން މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ) އިން މަނާކޮށްފިއެވެ.
އެމްއެފްޑީއޭއިން މަނާކުރީ ”އެވަރެސްޓް“ ބްރޭންޑުގެ ”ފިޝް ކަރީ މަސާލާ“ އާއި ”މެޑްރާސް ކަރީ ޕައުޑަރު“ގެ އިތުރުން ”އެމްޑީއެޗް“ގެ ބްރޭންޑުގެ ”ކަރީ ޕައުޑަރު މިކްސްޑް މަލާސާ ޕައުޑަރު“ އާއި ”ސާމްބާ ސަމާލާ މިކްސްޑް މަސާލާ ޕައުޑާ“ އެވެ.
އެމްއެފްޑީއޭ އިން މިއަދު ނެރުނު ބަޔާނެއްގައި ބުނީ އެ ދެ ބްރޭންޑްގެ ހަވާދުގެ ބައެއް ބާވަތްތަކުގައި ”އެތިލިން އޮކްސައިޑް“ ހުރި ކަމަށް ސިންގަޕޫރްގެ ފުޑް އެޖެންސީ އާއި ހޮންކޮންގުގެ ސެންޓަ ފޮ ފުޑް ސޭފްޓީން ބުނެފައިވާ ކަމަށެވެ. ”އެތިލިން އޮކްސައިޑަކީ“ ދަނޑުވެރިކަމުގެ އުފެއްދުންތައް ފިއުމިގޭޓް ކުރަން ބޭނުން ކުރާ ކެމިކަލްއެކެވެ.
އެމްއެފްޑީއޭއިން އިތުރަށް ބުނީ މި ބްރޭންޑުތަކުގެ ހަވާދުތަކަކީ ރާއްޖެއަށް ވެސް ގިނަ އަދަދަކަށް އެތެރެކޮށް ބޭނުން ކުރަމުންދާ ހަވާދުގެ ބާވަތްތަކެއް ކަމަށާއި އެހެންވެ ރާއްޖޭގެ ބާޒާރުގައި އެ ބާވަތްތައް ނުވިއްކުމަށާއި އެތެރެނުކުރުމަށް އަންގާ ކަމަށެވެ.
