ސަރުކާރުގެ އެންމެ ބޮޑު އަމާޒަކީ ކުރީ ސަރުކާރުން ފަށާފައިވާ މަޝްރޫއުތަކާއި މި ސަރުކާރުގެ އާ މަޝްރޫއުތައް އެކުގައި ކުރިއަށް ގެންގޮސް، ކަނޑައެޅިފައިވާ މުއްދަތަށް ނިންމާލުން ކަމަށް ހައުސިންގ މިނިސްޓަރު ޑރ. އަބްދުﷲ މުއްޠަލިބު މިއަދު ވިދާޅުވެއްޖެއެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި މެންބަރަކު ކުރެއްވި ސުވާލަކަށް ޖަވާބު ދެއްވަމުން މިނިސްޓަރު މުއްޠަލިބް ވިދާޅުވީ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން ވެރިކަމާ ހަވާލުވިއިރު، ކުރީ ސަރުކާރުން ސޮއިކޮށްފައިވާ ގާތްގަނޑަކަށް 40 ބިލިއަން ރުފިޔާގެ މަޝްރޫއުތައް ހުރި ކަމަށެވެ. މި ސަރުކާރުން ވެރިކަމަށް އައީ އަމިއްލަ މެނިފެސްޓޯއަކާއެކު ރައްޔިތުންނަށް ގިނަ ވައުދުތަކެއް ވެގެން ނަމަވެސް، ރައީސް މުޢިއްޒުގެ ނިންމެވުމަކީ ކުރީ ސަރުކާރުން ފަށާފައިވާ އެއްވެސް މަޝްރޫއެއް ހުއްޓާނުލައި، އެ ހުރިހާ މަޝްރޫއުތަކެއްވެސް އެއްކޮށް ނިންމާލުން ކަމަށް މިނިސްޓަރު ވިދާޅުވިއެވެ.
މަޝްރޫއުތައް ހިނގާ ދުވެލި ލަސްވާ ކަމަށް ބުނެ ދެކެވޭ ވާހަކަތަކަށް އިޝާރާތްކުރައްވައި މިނިސްޓަރު ވިދާޅުވީ، ސަރުކާރުން އެދޭހާ ބާރުމިނުގައި މަސައްކަތްތައް ނުދާކަން ގަބޫލުކުރައްވާ ކަމަށެވެ. ދައުލަތުގެ ބަޖެޓުން ކުރީގެ ބޮޑެތި މަޝްރޫއުތަކާއި އާ މަޝްރޫއުތައް އެއްފަހަރާ ކުރިއަށް ގެންދަން ޖެހުމަކީ ގޮންޖެހުން ބޮޑު، ހައްސާސް ކަމެއްކަން ފާހަގަކުރައްވަމުން މިނިސްޓަރު ވިދާޅުވީ، އެފަދަ ބޮޑު މާލީ ބުރައަކާއެކު މަސައްކަތް ކުރާއިރު ބައެއް ލަސްތަކާއި ހުރަސްތައް ދިމާވުމަކީ އެކަށީގެންވާ ކަމެއް ކަމަށެވެ.
ނަމަވެސް، މިހާރު މަޝްރޫއުތައް ރޭވިފައިވާ ހަރުދަނާ ޝެޑިއުލެއްގެ ދަށުން ބާރަށް ކުރިއަށްދާކަމުގެ ޔަގީންކަން މިނިސްޓަރު މުއްޠަލިބު ދެއްވިއެވެ. އަދި ސަރުކާރުގެ އަމާޒަކީ 2028 ވަނަ އަހަރުގެ މެދުތެރެއަށް ދާއިރު، މި ހުރިހާ މަސައްކަތްތަކެއް ނިންމައި، ރައްޔިތުންނަށް އޭގެ ފުރިހަމަ މަންފާ ލިބޭނެ ގޮތް ހެދުން ކަމަށް މިނިސްޓަރު ވިދާޅުވިއެވެ.
ސަރުކާރުގެ ސިޔާސަތަކީ އެއްވެސް ރަށެއް ބާކީނުކޮށް، ތަރައްގީގެ މަޝްރޫއުތައް އިންސާފުވެރިކަމާއެކު ކުރިއަށް ގެންގޮސް، ރައްޔިތުންގެ އުުންމީދުތައް ހަގީގަތަކަށް ހަދައިދިނުން ކަމަށް މިނިސްޓަރު މުއްޠަލިބް ވަނީ އިތުރަށް ވިދާޅުވެފައެވެ.
