ގަން އިންޓަރނޭޝަނަލް އެއާޕޯޓުން ސަޢުދީ ޢަރަބިއްޔާގެ ޖިއްދާއަށް ސީދާ އުމްރާ ދަތުރުތައް ރަސްމީކޮށް ފަށައިފިއެވެ.
މިއީ ހައްޖާއި އުމްރާގެ މަތިވެރި އަޅުކަމަށް ފުރާ ފަރާތްތަކަށް ލުއިފަސޭހަ އިންތިޒާމުތަކެއް ހަމަޖައްސައިދިނުމަށް ސަރުކާރުން ގެންގުޅޭ ސިޔާސަތުގެ ދަށުން އެޅުނު މުހިންމު ފިޔަވަޅެކެވެ. ގައުމީ އެއަރލައިން، މޯލްޑިވިއަންގެ އޭ 330 ވައިޑް-ބޮޑީ މަތިންދާބޯޓުގައި ފެށި މި ތާރީހީ ދަތުރަކީ އައްޑޫ ސިޓީގެ އިތުރުން، ދެކުނުގެ އަތޮޅުތަކުގެ ރައްޔިތުންނަށް ލިބިގެންދިޔަ ނުހަނު ބޮޑު ފަސޭހައެކެވެ.
ޓްރެވެލް އެޖެންސީއެއް ކަމަށްވާ ”ދަ ޓްރެވެލަރ“ އާއި މޯލްޑިވިއަން ގުޅިގެން ކުރިއަށްގެންދާ މި ދަތުރުގެ ފުރަތަމަ ފްލައިޓުގައި، ކުޑަކުދިން ހިމެނޭހެން ޖުމްލަ 260 އުމްރާވެރިން ވަނީ ސަޢުދީ ޢަރައްބިއްޔާއަށް ގޮސްފައެވެ.
މޯލްޑިވިއަނުން މައުލޫމާތު ދީފައިވާ ގޮތުގައި، ދެކުނުގެ އަތޮޅުތަކުން މާލެ ނުގޮސް ސީދާ އުމްރާއަށް ދެވޭނެ މަގު ތަނަވަސްވުމަކީ ސަރަހައްދީ ގޮތުން ރައްޔިތުންނަށް ލިބިގެންދިޔަ ވަރަށް ބޮޑު ކުރިއެރުމެކެވެ. އަދި ކުރިއަށް އޮތް ތަނުގައި މިފަދަ އިތުރު ދަތުރުތައް ބޭއްވުމަށް ރާވާފައިވާ ކަމަށްވެސް އެ އެއަރލައިނުން ހާމަކުރެއެވެ. މި ތާރީހީ ދަތުރުގެ ބައިވެރިންނަށް މޯލްޑިވިއަންގެ ފަރާތުން ވަނީ ހާއްސަ ހަދިޔާއެއްވެސް އަރުވާފައެވެ.
މިއާއެކު ދެކުނުގެ ހަތަރު އަތޮޅު ގުޅާލުމަށް ގާއިމުކޮށްފައިވާ ”ސައުތު ކަނެކްޓިވިޓީ ނެޓްވޯކް“ ގެ ބޭނުންތެރިކަން މިހާރު ވަނީ އިތުރަށް ފުޅާވެފައެވެ. އައްޑޫ ސިޓީއާއި، ފުވައްމުލައް ސިޓީގެ އިތުރުން ހުވަދޫ އަތޮޅުގެ ރަށްތަކުން ޝެޑިއުލް ދަތުރުތަކުގައި އައްޑޫއަށް އައިސް، އެތަނުން ސީދާ ސަޢުދީ ޢަރަބިއްޔާއަށް ފުރޭނެ އިންތިޒާމު ހަމަޖެހުމަކީ ދަތުރުފަތުރުގެ ނިޒާމަށް ލިބުނު ބޮޑު ކުރިއެރުމެކެވެ.
މޯލްޑިވިއަންއިން އެންމެ ފުރަތަމަ އުމްރާ ދަތުރުތައް ފަށާފައިވަނީ މިދިޔަ އަހަރުގެ ޖުލައި މަހުގެ ތެރޭގައެވެ. ވައިޑް-ބޮޑީ މަތިންދާބޯޓު ބޭނުންކޮށްގެން މި ހިދުމަތް ދެމުން އަންނައިރު، ފަހަކަށް އައިސް ރާއްޖެއިން އާއިލާތައް އެކުގައި އުމްރާއަށްދާ މިންވަރު އިތުރުވަމުންދާކަން ފާހަގަކުރެވެއެވެ.
