ޕީޕަލްސް ނޭޝަނަލް ކޮންގްރެސް (ޕީއެންސީ) އިން މިއަދު ބޭއްވި ދާއިރާތަކުގެ އިންތިހާބަކީ ރާއްޖޭގެ ސިޔާސީ ތާރީހުގައިވެސް ފާހަގަކޮށްލެވޭ ފަދަ ނަމޫނާ، ދެފުށް ފެންނަ ޑިމޮކްރެޓިކް އިންތިހާބެއް ކަމަށް ރައްޔިތުންގެ މަޖިލީހުގެ ރައީސް އަދި އެ ޕާޓީގެ ޗެއަރޕާސަން ޢަބްދުއްރަޙީމް ޢަބްދުﷲ ވިދާޅުވެއްޖެއެވެ.
ޢަބްދުއްރަޙީމް ފާހަގަކުރެއްވި ގޮތުގައި މިއީ އެހެން ސިޔާސީ ޕާޓީތަކުންވެސް ނަމޫނާ ލިބިގަންނަންޖެހޭ ފަދަ އިންތިހާބެކެވެ. އިންތިހާބުގެ ވޯޓުލުން ކުރިއަށްދަނިކޮށް މީޑިއާތަކާ ވާހަކަދައްކަވަމުން އޭނާ ވިދާޅުވީ، މި އިންތިހާބުން ހާމަވެގެންދަނީ ވަރުގަދަ ސިޔާސީ ޕާޓީއެއްގެ އެތެރޭގެ ހިންގުން ހަރުދަނާކޮށް ކުރިއަށްގެންދާނެ ފުރިހަމަ މިސާލެއް ކަމަށެވެ. އަދި މިއީ ރާއްޖޭގެ ސިޔާސީ ޕާޓީއެއްގެ އެތެރޭގެ އިންތިހާބެއްގައި އެންމެ ގިނަ އަދަދަކަށް ކެންޑިޑޭޓުން ކުރިމަތިލައި، އެންމެ ގިނަ މަގާމުތަކަށް މީހުން ހޮވާ އިންތިހާބުކަންވެސް އޭނާ ފާހަގަކުރެއްވިއެވެ.
ޢަބްދުއްރަޙީމް އިތުރަށް ވިދާޅުވީ، 2،086 މަގާމަށް މީހުން އިންތިހާބުކުރުމަށް ބާއްވާ މި އިންތިހާބުގައި އެ އަދަދަށްވުރެ މާ ގިނަ ކެންޑިޑޭޓުން ވާދަކުރަމުންދާ ކަމަށާއި، ރާއްޖޭގެ 131 ރަށެއްގައި ވޯޓު ފޮށި ބަހައްޓައިގެން ވަރަށް ވާދަވެރިކަމާއެކު އިންތިހާބު ކުރިއަށްދާ ކަމަށެވެ.
މި އިންތިހާބުގައި ރާއްޖޭގެ މީހުން ދިރިއުޅޭ ގިނަ ރަށްތަކެއް ހިމެނޭހެން ޖުމްލަ 131 ރަށު ދާއިރާއެއްގައި ވޯޓުލުން ކުރިއަށްދާނެއެވެ. ހަމައެހެންމެ، މި އިންތިހާބުގައި ވޯޓުލުމުގެ ހައްގު ލިބިގެންވަނީ މިދިޔަ ޖޫން މަހުގެ 15 ވަނަ ދުވަހުގެ ނިޔަލަށް އިލެކްޝަންސް ކޮމިޝަނުގެ ދަފްތަރުގައި ޕީއެންސީގެ މެންބަރުންގެ ގޮތުގައި ރަޖިސްޓްރީވެފައިވާ ފަރާތްތަކަށެވެ.
މި އިންތިހާބުގައި ދާއިރާތަކުގެ ރައީސުން ހޮވުމަށް ހަމަޖެހިފައިވަނީ ހަމައެކަނި ރައްޔިތުންގެ މަޖިލީހުގައި ޕީއެންސީ ތަމްސީލުކުރައްވާ މެންބަރަކު ނެތް ދާއިރާތަކުގައެވެ. ޕާޓީގެ އުސޫލުތައް ހަމަޖެހިފައިވާ ގޮތުން، މަޖިލިސް މެންބަރުން ތިއްބަވާ ދާއިރާތަކުގެ ރައީސުންގެ މަގާމު އިއްތިފާގުން ލިބިވަޑައިގަންނަވާނީ އެ ދާއިރާއެއް ތަމްސީލުކުރައްވާ މަޖިލިސް މެންބަރަށެވެ.
ދާއިރާތަކުގެ ރައީސުންގެ އިތުރުން، ދާއިރާތަކުގެ ނައިބު ރައީސުންނާއި، އަންހެނުންގެ ގޮފި އަދި ޒުވާނުންގެ ގޮފީގެ މަގާމުތަކަށް މެންބަރުން އިންތިހާބު ކުރުމަށް ވެސް ވަނީ ހަމަޖެހިފައެވެ.
