ފީފާ ވޯލްޑް ކަޕް 2026 ގެ ކުއާޓާ ފައިނަލްގައި ރޭ ކުޅުނު ފޯރިގަދަ މެޗުން މޮރޮކޯގެ މައްޗަށް 2-0 އިން ކުރިހޯދައި، މުބާރާތުގެ ފޭވަރިޓުންގެ ގޮތުގައި ބެލެވޭ ފްރާންސް ސެމީ ފައިނަލަށް ދަތުރުކޮށްފިއެވެ.
އެމެރިކާގެ މެސެޗޫސެޓްސްގެ ބޮސްޓަން ސްޓޭޑިއަމްގައި ކުޅުނު މި މެޗުގެ ފުރަތަމަ ހާފުގައި އެއްވެސް ޓީމަކަށް ލަނޑެއް ނުޖެހުނު އިރު، ފްރާންސްގެ ކެޕްޓަން ކީލިއަން އެމްބާޕޭ އަތުން ވަނީ ޕެނަލްޓީއެއް ބޭކާރުވެފައެވެ. ނަމަވެސް ދެވަނަ ހާފު ފެށިގެން ފްރާންސުން ވަނީ ކުޅުން ރަނގަޅުކޮށް ކުރު ފުރުސަތެއްގެ ތެރޭގައި ދެ ލަނޑު ޖަހާފައެވެ. ފްރާންސްގެ ލަނޑުތައް ކާމިޔާބުކޮށްދިނީ ކެޕްޓަން އެމްބާޕޭ އާއި އޮސްމާން ޑެމްބެލޭއެވެ.
މި ނަތީޖާއާއެކު ފްރާންސް މިވަނީ ޖެހިޖެހިގެން ތިންވަނަ ފަހަރަށް ވޯލްޑް ކަޕްގެ ސެމީ ފައިނަލުން ޖާގަ ހޯދާފައެވެ. 2022 ވަނަ އަހަރު ގަތަރުގައި ބޭއްވި ވޯލްޑް ކަޕްގެ ފައިނަލުގައި އާޖެންޓީނާ އަތުން ބަލިވި ނަމަވެސް، މި އަހަރުގެ މުބާރާތުގައި ފްރާންސް ފެންނަނީ ވަރަށް ވަރުގަދަ ޓީމެއްގެ ގޮތުގައެވެ.
މޮރޮކޯއަކީ މީގެ ހަތަރު އަހަރު ކުރިން ގަތަރުގައި ބޭއްވި ވޯލްޑް ކަޕްގެ ސެމީ ފައިނަލަށް ދަތުރުކުރި ފުރަތަމަ އެފްރިކާގެ ގައުމެވެ. އެ ފަހަރުވެސް މޮރޮކޯ ބަލިވީ ފްރާންސް އަތުންނެވެ. މި އަހަރުގެ މުބާރާތުގެ ކުއާޓާ ފައިނަލަށް ދަތުރުކުރި ހަމައެކަނި އެފްރިކާގެ ގައުމަކީ ވެސް މޮރޮކޯއެވެ.
މެޗުގެ ފަހު ފަނަރަ މިނެޓަށް ވެފައި ވަނިކޮށް ފްރާންސްގެ ސަޕޯޓަރުންނަށް ކަންބޮޑުވުމެއް ކުރިމަތިވީ، އެމްބާޕޭގެ ފަޔަށް ލިބުނު އަނިޔާއަކާ ގުޅިގެން އޭނާ ބަދަލުކުރަން ޖެހުމުންނެވެ. އޭނާ ބަދަލުކުރި އިރު ފައިގައި އައިސްޕެކް އަޅާފައި ހުއްޓެވެ.
މި މެޗުން ބަލިވުމާއެކު، މިއަހަރުގެ ވޯލްޑް ކަޕްގައި ބާކީ އޮތް އެފްރިކާގެ ހަމައެކަނި ޓީމު ކަމަށްވާ މޮރޮކޯއަށް ވަނީ މުބާރާތާ އަލްވަދާއު ކިޔަން ޖެހިފައެވެ. ކުއާޓާ ފައިނަލްގެ ބާކީ ހުރި މެޗުތަކަށް ބަލާއިރު، މުބާރާތުގައި މިހާރު ގިނައީ ވިލާތުގެ ގައުމުތަކެވެ.
މިމެޗު ބަލަން ވަން މޮރޮކޯގެ ސަޕޯޓަރުންގެ ތެރެއިން ގިނަ އަދަދެއްގެ ފަލަސްތީނު ދިދަ އާއި ކެފިޔާ ފެނިގެންދިޔަކަން ފާހަގަކުރެވެއެވެ. އަރަބި ގައުމުތަކުގެ ސަޕޯޓަރުން އަންނަނީ މުބާރާތުގެ ފެށުނީއްސުރެ ފަލަސްތީނާ އެކު ތިބިކަން ހާމަކުރުމުގެ ގޮތުން ފަލަސްތީނުގެ ދިދަ ބޭނުންކުރަމުންނެވެ.
