މާލޭގެ ރަސްމީ ފާލަން ކައިރިން ކަނޑުމަތީގައި ލޯންޗަކާއި ދޯންޏެއް ޖެހި މިރޭ ނުރައްކާތެރި އެކްސިޑެންޓެއް ހިނގައިފިއެވެ. މި ހާދިސާގައި ތިން މީހަކަށް އަނިޔާވެފައިވާ ކަމަށް މެރިން ފުލުހުން ވަނީ ހާމަކޮށްފައެވެ.
މެރިން ފުލުހުން ފޭސްބުކް މެދުވެރިކޮށް މިރޭ އާންމުކުރި މައުލޫމާތުގައި ބުނެފައިވަނީ، މި އެކްސިޑެންޓް ހިނގާފައިވަނީ މިރޭ 9:10 އެހާކަންހާއިރު ކަމަށެވެ. އެކްސިޑެންޓް ހިނގަން މެދުވެރިވީ މާލޭގެ ރަސްމީ ފާލަމާ ދިމާލުން ބޭރުން ކަނޑުމަތީގައި ދަތުރުކުރަމުންދިޔަ ލޯންޗަކާއި ދޯންޏެއް ޖެހިގެންނެވެ.
މި ހާދިސާގައި އަނިޔާވި ތިން މީހުންނަށް އިތުރު ފަރުވާ ދިނުމަށްޓަކައި މިހާރު ވަނީ އިންދިރާ ގާންދީ މެމޯރިއަލް ހޮސްޕިޓަލް (އައިޖީއެމްއެޗް) އަށް ގެންގޮސްފައެވެ. ނަމަވެސް އެމީހުންނަށް ލިބިފައިވާ އަނިޔާގެ ތަފްސީލެއް ފުލުހުން އަދި ހާމަކޮށްފައެއް ނުވެއެވެ.
މި އެކްސިޑެންޓުގައި ހިމެނޭ ލޯންޗަށް ބޮޑެތި ގެއްލުންތަކެއް ލިބިފައިވާކަން ފާހަގަކުރެވެއެވެ. ފުލުހުން ދަނީ މި ހާދިސާ ހިނގަން މެދުވެރިވި ސަބަބު އިތުރަށް ތަހުގީގު ކުރަމުންނެވެ.
