ޕޯސްޓް މެދުވެރިކޮށް ރާއްޖެއަށް އެތެރެކުރަން އުޅުނު 3.6 ކިލޯގްރާމްގެ ސިންތެޓިކް ކެތިނޯން، މޯލްޑިވްސް ކަސްޓަމްސް ސާވިސްއިން އަތުލައިގަނެފިއެވެ.
މި ތަކެތީގެ މަގުމަތީ އަގު ފަސް މިލިއަން ދިވެހި ރުފިޔާއަށްވުރެ މަތިވާނެ ކަމަށް އެ އިދާރާއިން ލަފާކުރެއެވެ.
ކަސްޓަމްސްއިން ބުނި ގޮތުގައި މި މަސްތުވާތަކެތި ފެނިފައިވަނީ މަހުގެ 18 ވަނަ ދުވަހު ކަސްޓަމްސްއިން ހިންގި އޮޕަރޭޝަނެއްގައި ރާއްޖެއަށް އެތެރެކުރި ޕޯސްޓް ޕާރުސަލުތައް ބަލައި ފާސްކުރުމުގެ ތެރޭގައެވެ.
ތަހުލީލުތަކުން މި ތަކެއްޗަކީ ސިންތެޓިކް ކެތިނޯން ކަމަށް ކަސްޓަމްސްއިން ކަށަވަރުކޮށްދީފައިވެއެވެ. ޖުމްލަ 3.6 ކިލޯގްރާމްގެ މި ބާވަތުގެ މަސްތުވާތަކެތީގެ މަގުމަތީ އަގު ފަސް މިލިއަން ރުފިޔާއަށްވުރެ މައްޗަށް އަރާނެކަމަށް އެ އިދާރާއިން އަންދާޒާކުރެއެވެ.
މި މައްސަލައާ ގުޅިގެން އިތުރު ތަފުސީލެއް އަދި ހާމަކޮށްފައެއް ނުވެއެވެ.
އާންމު އުސޫލުގެ މަތިން މިފަދަ މައްސަލަތަކުގައި އަތުލައިގަނެވޭ ތަކެތި އިތުރަށް ތަހުގީގުކުރުމަށްޓަކައި ދިވެހި ފުލުހުންގެ ޚިދުމަތާ ހަވާލުކުރެއެވެ. މި މައްސަލާގައި އެއްވެސް މީހަކު ހައްޔަރުކޮށްފައިވާކަން ނުވަތަ މި ތަކެތި އެތެރެކޮށްފައިވަނީ ކޮން ގައުމަކުންކަން އަދި އެނގިފައެއް ނުވެއެވެ.
