ގައުމީ އެއާލައިން، މޯލްޑިވިއަން ހިންގާ އައިލެންޑް އޭވިއޭޝަންގެ މުވައްޒަފުންނަށް ހާއްސަކޮށްގެން ބޯހިޔާވަހިކަމުގެ މަޝްރޫއެއް ކުރިއަށް ގެންދިއުމަށް ނިންމައިފިއެވެ.
މި މަޝްރޫއު ކުރިއަށް ގެންދިއުމަށް ބޭނުންވާ ބިން ހަމަޖައްސައި، ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) އިން އިއްޔެ ވަނީ އެ ބިން އައިލެންޑް އޭވިއޭޝަނާ ހަވާލުކޮށްފައެވެ. މިކަމުގެ އެއްބަސްވުމުގައި އެޗްޑީސީގެ ފަރާތުން ސޮއިކުރެއްވީ އެ ކުންފުނީގެ މެނޭޖިންގ ޑިރެކްޓަރު ޢަލީ ޒުހައިރެވެ. އަދި އައިލެންޑް އޭވިއޭޝަންގެ ފަރާތުން ސޮއިކުރެއްވީ އެ ކުންފުނީގެ މެނޭޖިންގ ޑިރެކްޓަރު އިބްރާހިމް އިޔާސް އެވެ.
އައިލެންޑް އޭވިއޭޝަންގެ މެނޭޖިންގ ޑިރެކްޓަރު އިބްރާހިމް އިޔާސް ވިދާޅުވި ގޮތުގައި، ހުޅުމާލެ ދެވަނަ ފިޔަވަހިން މި މަޝްރޫއަށް 12،000 އަކަފޫޓަށްވުރެ ބޮޑު ބިމެއް ވަނީ ލިބިފައެވެ. ބިން ހަވާލުކުރުމާ ގުޅިގެން، މަޝްރޫއުގެ އަމަލީ މަސައްކަތްތައް ފެށުމަށް ތައްޔާރުވަމުންދާ ކަމަށާއި، އިމާރާތް ކުރެވޭ ފްލެޓްތަކުގެ ތަފްސީލީ މައުލޫމާތު ކުރިއަށް އޮތް ތަނުގައި ހާމަކުރައްވާނެ ކަމަށް އޭނާ ވިދާޅުވިއެވެ.
މީގެ ކުރިންވެސް ސަރުކާރުގެ އެކި ކުންފުނިތަކުން ވަނީ ހުޅުމާލޭގައި މުވައްޒަފުންނަށް ހާއްސަ ބޯހިޔާވަހިކަމުގެ މަޝްރޫއުތައް ކާމިޔާބުކަމާއެކު ހިންގާފައެވެ. އޭގެ ތެރޭގައި އެމްއޭސީއެލް، އެމްޕީއެލް އަދި ސްޓެލްކޯ ފަދަ ކުންފުނިތައް ހިމެނެއެވެ.
