ނިމިދިޔަ އެމްޑީޕީ ސަރުކާރުން ކުރިއަށްގެންދިޔަ ސްކޫލް ކުދިންގެ ހެނދުނުގެ ނާސްތާ ޕްރޮގްރާމަކީ ރާއްޖޭގެ ހާލަތާއި ފަސްމަންޒަރަށް ބެލުމެއް ނެތި ފެށި މަޝްރޫއެއް ކަމަށް އެޑިއުކޭޝަން މިނިސްޓަރު ޑރ. އިސްމާއިލް ޝަފީއު ވިދާޅުވެއްޖެއެވެ.
އިއްޔެ ރައްޔިތުންގެ މަޖިލީހުގައި މެންބަރު އަހުމަދު ފަލާހު ކުރެއްވި ސުވާލަކަށް ޖަވާބު ދެއްވަމުން މިނިސްޓަރު ވިދާޅުވީ، ދުނިޔޭގެ ގިނަ ގައުމުތަކުގައި ”ސްކޫލް މީލްސް“ ޕްރޮގްރާމްތައް ހިންގި ނަމަވެސް، ކޮންމެ ޕްރޮގްރާމެއްވެސް ހިންގަންވާނީ އެ ގައުމެއްގެ ހާލަތާ ގުޅޭގޮތަށް (ކޮންޓެކްސްޗުއަލައިޒް ކޮށްގެން) ކަމަށެވެ.
މިނިސްޓަރު ފާހަގަކުރެއްވި ގޮތުގައި، އެމްޑީޕީގެ ސަރުކާރުން ގާނޫނުގައި ކޮންމެ ކުއްޖަކަށް ނާސްތާ ދޭންވާނެ ކަމަށް ލިޔެ، އެކަން ފެށި ނަމަވެސް، ފަހުން އެ ސަރުކާރުގެ އެޑިއުކޭޝަން މިނިސްޓްރީން ވަނީ ހުރިހާ ކުދިންނަށް ނާސްތާ ނުދީ، ހަމައެކަނި ބޭނުންވާ ކުދިންނަށް ނާސްތާ ދޭ ގޮތަށް ނިންމާފައެވެ. އަދި ވަކި ހިސާބަކުން އެ ޕްރޮގްރާމް ވަނީ މެދުކަނޑާލާފައެވެ.
މިހާރުގެ ސަރުކާރުން މިކަމުގައި ގެންގުޅޭ ސިޔާސަތާ ގުޅޭގޮތުން ވާހަކަ ދައްކަވަމުން މިނިސްޓަރު ޝަފީއު ވިދާޅުވީ، ކޮންމެ އަހަރަކުވެސް ސްކޫލް ފެށޭއިރު ހާލަތު ނިކަމެތި ކުދިން ދެނެގަނެ، ރަށުގެ މަސްލަހަތުވެރިންނާ ވާހަކަދައްކައިގެން އެކުދިންނަށް ބޭނުންވާ އެހީތެރިކަން ފޯރުކޮށްދެމުންދާ ކަމަށެވެ.
”އަޅުގަނޑަށް މައުލޫމާތު ލިބިފައިވާ ގޮތުގައި މިހާރުވެސް ގާތްގަނޑަކަށް 41 އަށްވުރެ ގިނަ ދަރިވަރުންނަށް އެ އެހީތެރިކަން ފޯރުކޮށްދެވެމުންދޭ. އަޅުގަނޑުގެ ހިތުން ރާއްޖޭގައި މިފަދަ ޕްރޮގްރާމެއް ކުރިއަށް ގެންދެވޭނީ މިފަދަ ގޮތަކަށް،“ މިނިސްޓަރު ވިދާޅުވިއެވެ.
މިނިސްޓަރު އިތުރަށް ވިދާޅުވީ، އެމްޑީޕީ ސަރުކާރުން ރަނގަޅަށް ރޭވުމެއް ނެތި ފެށި މި ޕްރޮގްރާމް މެދުކަނޑާލަން ޖެހުނު ސަބަބުތައް ދެނެގަތުމަކީ މުހިންމު ކަމެއް ކަމަށާއި، މިހާރުގެ ސަރުކާރުން މަސައްކަތް ކުރަމުންދަނީ އެންމެ އެހީތެރިކަން ބޭނުންވާ ކުދިންނަށް އަމާޒުކޮށްގެން ދެމެހެއްޓެނިވި ގޮތެއްގައި މިފަދަ އެހީތެރިކަން ފޯރުކޮށްދިނުމަށް ކަމަށެވެ.
